ოფიციალურ თბილისს, საქართველოსთან ნორმალური ურთიერთობის აღდგენის თაობაზე, რუსეთის პრემიერ-მინისტრ ვლადიმერ პუტინის განცხადების გულწრფელობის არ სჯერა.
"თუ რუსეთის პრემიერს სურს კეთილმეზობლური ურთიერთობა საქართველოსთან, მე შემიძლია ძალიან მარტივი რეცეპტი შევთავაზო იმისთვის, რომ ქართველმა ხალხმა რუსეთი საქართველოს მეგობრად მართლა ჩათვალოს _ ეს არის საქართველოს დეოკუპაცია. რუსული შეიარაღებული ძალები სწრაფად უნდა გავიდნენ საქართველოს ტერიტორიიდან და ჩვენ ამის შემდეგ მართლა დავიწყებთ ნორმალურ განვითარებაზე და სტაბილურობაზე ორიენტირებულ ურთიერთობას", - განუცხადა ჟურნალისტებს დეპუტატმა აკაკი მინაშვილმა პუტინის განცხადებაზე კომენტირებისას.
შეგახსენებთ, რომ გუშინ, "პაკლონნაია გორაზე" "დიდების მემორიალის" ანალოგის გახსნისას ვლადიმერ პუტინმა განაცხადა, რომ "ჯერ არავის ძალუძს დააპირისპიროს და გაწყვიტოს ქართულ-რუსული ურთიერთობები, ტრადიციული, ადამიანური და სულიერი კავშირები". "ჩვენ ამ კავშირებისკენ გულწრფელად მივისწრაფით", - აღნიშნა რუსეთის პრემიერმა.