"ქართული პარტია" "პრესა.გე"-ს ჟურნალისტებს სოლიდარობას უცხადებს და ამასთან დაკავშირებით, ანცხადებას აქვეყნებს.
"ქართული პარტია" გმობს თავისუფალ მედიასაშუალებებზე ხელისუფლების ზეწოლის მორიგ ფაქტს, რისი შედეგიც არის საინფორმაციო-პოლიტიკური ინტერნეტგამოცემა "პრესა.გე"-დან ჟურნალისტთა მთელი შემადგენლობის წასვლა. ამ შემთხვევამ კიდევ ერთხელ დაადასტურა, რომ სააკაშვილის რეჟიმი ვერ ეგუება ობიექტური ინფორმაციის გავრცელებას და ისწრაფის იმისკენ, რომ საზოგადოებას მხოლოდ მკაცრი ცენზურის შედეგად გაფილტრული ინფორმაცია მიეწოდებოდეს", _ აღნიშნულია განცხადებაში.
განცხადებაში აღნიშნულია, რომ დღეს საქართველოში თითქმის მთელი საინფორმაციო სივრცე ხელისუფლების ტოტალური კონტროლის ქვეშაა მოქცეული.
"ასეთ პირობებში დევნას განიცდიან ის ჟურნალისტები, რომლებსაც არ სურთ მმართველი რეჟიმის მაამებელ მედიამსახურებად იქცნენ და მის ვიწროპოლიტიკურ ინტერესებს ემსახურონ. ქვეყანაში შექმნილი სწორედ ასეთი ვითარების მძევლები და მსხვერპლნი აღმოჩნდნენ "პრესა.გე"-ს ჟურნალისტები, რომლებიც ვერ შეეგუვნენ დიქტატს და სამსახური დატოვეს.
მათ მიერ გამოხატული პროტესტით ნათლად გამოჩნდა, რომ სააკაშვილის რეჟიმის საუბარი "მედიასივრცის გამჭვირვალეობის გაუმჯობესებაზე" ქართული და საერთაშორისო საზოგადოების შეცდომაში შეყვანის მცდელობას წარმოადგენს და მსგავსი სურვილი ხელისუფლებას საერთოდ არ გააჩნია", _ ნათქვამია განცხადებაში.