რუსეთის პრემიერ-მინისტრმა ვლადიმერ პუტინმა მოსკოვში პოკლონნაია გორაზე ქუთაისში დემონტირებული "დიდების მემორიალის" ანალოგი გახსნა.
"პრემიერმა ვლადიმერ პუტინმა, როგორც იქნა თავისი ჩანაფიქრი განახორციელა და ქუთაისში აფეთქებული მემორიალის ანალოგი გახსნა, რომელიც ქუთაისში აფეთქებული მემორიალის მოტივებზე შეიქმნა", _ წერს აღნიშნული ფაქტის გაშუქებისას რუსული მედია და აღნიშნავს, რომ ამ მემორიალის ანალოგის გახსნა თავად ვლადიმერ პუტინის იდეა იყო.
ამასთან ერთად რუსული მედია ასევე აღნიშნავს, რომ მემორიალის 21 დეკემბერს გახსნა სპეციალურად მოხდა.
"ამ მემორიალის გახსნა 19 დეკემბერს იგეგმებოდა, ანუ ზუსტად წლისთავზე ქუთაისში მისი აფეთქებიდან. მაგრამ მოგვიანებით მისი გახსნა 21 დეკემბრისათვის - მიხეილ სააკაშვილის დაბადების დღისათვის გადაწყდა. მიხეილ ნიკოლოზის ძეს სავარაუდოდ გული აუჩუყდება ამგვარი საჩუქრის გამო", _ წერს რუსული მედია.
მათივე ინფორმაციით, მემორიალის გახსნას ქართველი ოპოზიციონერები - ნინო ბურჯანაძე და ზურაბ ნოღაიდელი ესწრებოდნენ. გახსნის ოფიციალური ცერემონიალის შემდეგ ვლადიმერ პუტინმა ნინო ბურჯანაძესთან პირადად გასაუბრება გადაწყვიტა.
რუსული მედია აღნიშნავს, რომ მაგიდასთან თარჯიმნისთვის ადგილი დატოვებული იყო, თუმცა მისი დახმარება საჭირო არ გახდა - რუსეთის პრემიერი და ქართველი ოპოზიციონერი რუსულ ენაზე საუბრობდნენ.
საუბრის დასაწყისში ვლადიმერ პუტინმა მადლობა გადაუხადა ნინო ბურჯანაძეს იმისათვის, რომ მან იპოვა დრო და მოსკოვში მემორიალის გახსნაზე ჩავიდა.
_ იმედი მაქვს მოგეწონათ, ეს ძეგლი გახდება კარგი სიმბოლო ჩვენი ურთიერთობების ნორმალიზაციის დაწყებისა - დაიწყო პუტინმა. - ამ სიტყვებმა, როგორც ჩანს გაახარეს ნინო ბურჯანაძე, რომელმაც განაცხადა, რომ მოსკოვსა და თბილისს შორის ცუდი ურთიერთობები ახლა არავის არ სჭირდება, _ აღნიშნავს რუსული მედია.