ფინანსთა მინისტრი კახა ბაინდურაშვილი მთავრობის წევრებს დღეს 2010 წლის განმავლობაში თანხის უკან დაბრუნების შესახებ ინფორმაციას მიაწვდის.
როგორც მთავრობის სხდომის დაწყების წინ კახა ბაინდურაშვილმა განაცხადა, 2009 წლის ბოლოს პრეზიდენტი გამოვიდა ინიციატივით, რომლის მიხედვითაც, ბიზნესს ზედმეტად გადახდილი თანხის უკან დაბრუნება გაუმარტივდა.
მინისტრის თქმით, ამ ინიციატივიდან ერთი წლის თავზე ბიზნესმა 170 მილიონი ლარი დაიბრუნა.
"მთავრობას მინდა თანხის დაბრუნების შედეგები მოვახსენო. ეს არის პრეზიდენტის ინიციატივა, რომელიც ლოპოტას ტბაზე გამართულ მთავრობის სხდომაზე გაჟღერდა. მაშინ იმთავითვე იყო მოწოდება, რომ კანონში შესულიყო ცვლილებები და საკანონმდებლო ინიციატივა განხორციელდა კიდეც. ამ ინიციატივებიდან ერთი წლის თავზე ბიზნესს 170 მილიონი ლარი დაუბრუნდა", - განაცხადა ბაინდურაშვილმა.
ფინანსთა მინისტრის განმარტებით, აღნიშნულ ინიციატივამდე ბიზნესისთვის უკან დაბრუნებული მაქსიმალური თანხა წელიწადში 80 მილიონ ლარს შეადგენდა.
მინისტრი აღიარებს, რომ პრეზიდენტის ინიციატივამდე გარკვეული პრობლემები არსებობდა, რომლებიც დღეს ფაქტობრივად აღარ არსებობს.