უკრაინის პრეზიდენტი ვოლოდიმირ ზელენსკი აშშ-სა და კანადაში ვიზიტების შემდეგ კიევში დაბრუნებამდე პოლონეთში ჩავიდა.
ზელენსკი იმყოფებოდა ქალაქ ლუბლინში, სადაც უკრაინელი ლტოლვილების დახმარებისთვის ორი პოლონელი მოხალისე დააჯილდოვა.
უკრაინის სახელმწიფო ჯილდოები მიიღეს ჟურნალისტმა ბიანკა ზალევსკაიამ და მოხალისემ დამიან დუდამ, რომლებმაც დაჭრილი უკრაინელი ჯარისკაცების დასახმარებლად სამედიცინო ჯგუფი შექმნეს.
„მადლობას ვუხდი მთელ პოლონეთს ფასდაუდებელი მხარდაჭერისა და სოლიდარობისთვის, რომელიც ეხმარება დაიცვას მთელი ჩვენი ევროპის თავისუფლება!“ - დაწერა ზელენსკიმ ტვიტერში.
ბოლო დღეებში ორ ქვეყანას შორის ურთიერთობას ჩრდილი მიადგა უკრაინული მარცვლეულის მიწოდების გამო უთანხმოების გამო, თუმცა კიევი და ვარშავა შეთანხმდნენ ამ საკითხზე კომპრომისის მოძიებაზე.
პოლონეთის პრემიერ-მინისტრმა მათეუშ მორავიეცკიმ ცოტა ხნის წინ განაცხადა, რომ ვარშავა უკრაინას აღარ მიაწვდის შეიარაღებას და ორიენტირებული იქნება საკუთარ თავდაცვით საჭიროებებზე. აღნიშნული განცხადება კიევსა და ვარშავას შორის უკრაინული მარცვლეულის ექსპორტის საკითხთან დაკავშირებული უთანხმოების ფონზე გაჟღერდა.
თუმცა შემდეგ პოლონეთის პრეზიდენტმა ანჯეი დუდამ განაცხადა, რომ ქვეყნის პრემიერ-მინისტრის მათეუშ მორავიეცკის სიტყვები უკრაინისთვის შეიარაღების მიწოდების შეწყვეტის შესახებ არასწორად გაიგეს.
„მორავიეცკის სიტყვები ყველაზე ცუდი ფორმით იქნა ინტერპრეტირებული. ჩემი აზრით, პრემიერ-მინისტრმა იგულისხმა, რომ უკრაინას არ გადავცემთ ახალ იარაღს, რომელსაც ამჟამად ვყიდულობთ პოლონეთის არმიის მოდერნიზაციისთვის“, - განუცხადა დუდამ პოლონურ ტელეკომპანია TVN24-ს.
ასევე, მათეუშ მორავიეცკიმ უკრაინის პრეზიდენტს ვოლოდიმირ ზელენსკის მოუწოდა აღარასდროს მიაყენოს შეურაცხყოფა პოლონელებს, როგორც ეს გაეროს გენერალურ ასამბლეაზე გააკეთა.
