უკრაინის პრეზიდენტმა ვოლოდიმირ ზელენსკიმ ევროპულ ქვეყნებს მოუწოდა, ნოემბრის ბოლომდე შეარჩიონ ერთი წარმომადგენელი, რომელიც რუსეთთან სამშვიდობო მოლაპარაკებებში ევროპის სახელით მიიღებს მონაწილეობას. მისი თქმით, გადაწყვეტილების მიღება სასურველია 19 ნოემბერს, ბერლინში, „მსურველთა კოალიციის“ ლიდერების შეხვედრაზე.
ამის შესახებ ზელენსკიმ დანიაში ვიზიტისას განაცხადა.
ზელენსკის თქმით, ევროპამ უნდა გადაწყვიტოს, ვინ ისაუბრებს მისი სახელით მოლაპარაკებების მაგიდასთან. მისი თქმით, მნიშვნელოვანია, რომ არჩეულ წარმომადგენელს მთელი ევროპის, მათ შორის ევროკავშირის არაწევრი ქვეყნების, მანდატი ჰქონდეს.
„ყველას სურს წარმომადგენლობა. თითოეული ევროპული ქვეყნის ხმა ძალიან მნიშვნელოვანია, მაგრამ პუტინთან 40 ადამიანი ვერ ისაუბრებს“, - განაცხადა ზელენსკიმ კოპენჰაგენში, დანიის პრემიერ-მინისტრ მეტე ფრედერიკსენთან ერთად გამართულ შეხვედრაზე.
უკრაინის პრეზიდენტის თქმით, ევროპული ქვეყნების მონაწილეობა მოლაპარაკებებში მნიშვნელოვანია, რადგან ომი ევროპაში მიმდინარეობს და სწორედ ევროპას მოუწევს უკრაინის უსაფრთხოების გარანტიების უზრუნველყოფა და ქვეყნის აღდგენაში მონაწილეობა.
ზელენსკიმ იმედი გამოთქვა, რომ საკითხი არაუგვიანეს ნოემბრის ბოლოს გადაწყდება, სასურველია, 19 ნოემბერს ბერლინში დაგეგმილ „მსურველთა კოალიციის“ შეხვედრაზე.
მანამდე, 10 ნოემბერს, აბუ-დაბიში უკრაინის, რუსეთისა და აშშ-ის წარმომადგენლებს შორის სამმხრივი მოლაპარაკებები დაიწყო. ზელენსკის განცხადებით, პირველ დღეს მხარეებმა, მათ შორის, ჰუმანიტარული საკითხები განიხილეს.
