სამომხმარებლო ბაზარზე სიცოცხლისთვის სახიფათო შემცველობის ნამცხვრების რეალიზაცია ხდება. შესაბამისი დასკვნა მომხმარებელთა ფედერაციას ეკუთვნის. როგორც ფედერაციის დირექტორმა მადონა კოიძემ დღეს გამართულ პრესკონფერენციაზე განაცხადა, კვლევის შედეგად კუსტარულად დამზადებული ნაწარმის უმრავლესობაში დიდი ოდენობით საფუარის სოკო და ობის ნიშნები აღმოჩნდა.
"ჩვენ შევიძინეთ 24 დასახელების ნამცხვარი, ჩატარდა ლაბორატორიული კვლევა და აღმოჩნდა, რომ ნამცხვრები შეიცავს დიდი ოდენობით საფუარის სოკოს, რაც პროდუქტის სიძველის ნიშანია. გარდა ამისა, ის შეიცავს გაურკვეველი წარმოშობის ინგრედიენტებსაც, რომელთა დადგენა ლაბორატორიებსაც კი გაუჭირდათ", - განაცხადა კოიძემ.
მისი თქმით, დარღვეულია პროდუქტის შენახვის ვადებიც და პროდუქციას, რომელსაც მხოლოდ საათობრივი შენახვის ვადა აქვს, რამდენიმე დღის განმავლობაში ყიდიან.
"შპს "ინაკოსის" მიერ წარმოებულ 6-ლარიან ნამცხვრებზე ნორმატიულ დოკუმენტში მინიშნებული აქვთ 14-დღიანი ვადა, მაგრამ მისი შენახვა, მხოლოდ 32-52 საათია. არსებულ ეტიკეტებზე არის არასწორი ინფორმაცია და ეს უნდა გაკონტროლდეს სურსათის უვნებლობის სამსახურის მიერ", - განმარტა მან და აღნიშნა, რომ რიგ საკონდიტრო მაღაზიაში ნამცხვრები ანტისანიტარული ნორმების დარღვევით ცხვება.
