რუსი ოკუპანტების მიერ კახოვკის ჰიდროელექტროსადგურის კაშხლის აფეთქების შედეგად, დატბორილი დასახლებული პუნქტებიდან 40 ათასამდე ადამიანის ევაკუაციაა საჭირო. ტერიტორიებიდან, რომლებსაც უკრაინის ხელისუფლება აკონტროლებს, ევაკუაცია მიმდინარეობს, თუმცა ოკუპირებული ტერიტორიებიდან მოსახლეობის გადარჩენის შანსები თითქმის არ არის.
ამის შესახებ ხერსონის ოლქის, ანტონოვკის დასახლების მცხოვრებმა ტატიანა ახმეტენკომ ტელემარათონის დროს განაცხადა. მისი თქმით, ადგილობრივები ცდილობენ დაეხმარონ ოკუპირებულ ტერიტორიებზე დარჩენილ ადამიანებს. რამდენიმე მოქალაქემ, რომელთა სახლებიც წყალმა დაფარა, ნავებით გადარჩენა შეძლო, თუმცა ამის გაკეთება უკიდურესად რთულია, რადგან რუსი ოკუპანტები მათ ცეცხლს უხსნიან.
„შეხედეთ, იქ {მარცხენა სანაპიროზე} ჩვენი ახლობლები დარჩნენ. ისინი მუმდივად გვეკონტაქტებიან, ამბობენ, რომ ვითარება ძალიან მძიმეა - წყალი სულ უფრო მატულობს, მაგრამ მათ ევაკუაციის საშუალებას არ აძლევენ, ფეხებში ესვრიან. რამდენჯერმე ყუმბარები ესროლეს მათ, ვინც გამოსვლას ცდილობდა. ვითარება ძალიან რთულია, ყოველ საათს მათთან კავშირში ვართ, ძალიან განვიცდით. დილით რამდენიმე ადამიანს ვესაუბრეთ, ისინი ამბობენ, რომ ხალხი სახურავებზე ზის, დახმარებას ელიან, მაგრამ მათ ჯერ არავინ ეხმარება“, - თქვა ტატიანამ.
მძიმე მდგომარეობაა ანტონოვკაშიც. დასახლება სხვა დასახლებული პუნქტებისგან მოწყვეტილია.
უკრაინის ხელისუფლების განცხადებით, 6 ივნისის ღამეს, რუსმა ოკუპანტებმა კახოვკის ჰიდროელექტროსადგურის კაშხალი ააფეთქეს. ხერსონის ოლქში, დნიპროს მარჯვენა სანაპიროზე უკვე დატბორილია 20 დასახლებული პუნქტი და 1900-ზე მეტი საცხოვრებელი სახლი. უკრაინული მედია აღნიშნავს, რომ 25 ათასამდე ადამიანი ოკუპირებულ მარცხენა სანაპიროზე იმყოფება. საოკუპაციო რეჟიმი ამტკიცებს, რომ დატბორილ რაიონებში დახმარებისთვის არავის მიუმართავს, ამავე დროს, ოკუპირებულ ტერიტორიებზე უკრაინელი სამხედროების მიერ გადაღებულ ვიდეოკადრებში ჩანს ხალხი, რომლებიც სახლების სხვენებში არიან ბლოკირებულები და შველას უიმედოდ ითხოვენ.