ზუგდიდი საკრებულოს შენობაში, საკრებულოს ხუთმა წევრმა "ნაციონალური მოძრაობიდან" შიმშილობა დაიწყო.
შიმშილობა გამოაცხადეს დეპუტატებმა - მაია კალანდია, დაკო არქანია, მალხაზ ჯალაღონია, ირაკლი სორდია და ხათუნა შამუგია.
ადგილობრივი თვითმმართველობის ორგანოს წევრები მიხეილ სააკაშვილის სამოქალაქო კლინიკაში დაუყოვნებლივ გადაყვანას მოითხოვენ.
მათი თქმით, თუ სამ დღეში არ შესრულდება ეს მოთხოვნა, უკვე გადაინაცვლებენ გუბერნიის წინ, რის შემდეგაც ჩაკეტავენ როგორც გუბერნიის შესასვლელს, ასევე გასასვლელებსაც.
მანამდე, მიხეილ სააკაშვილის სამოქალაქო კლინიკაში გადაყვანის მოთხოვნით, შიმშილობა რუსთავის საკრებულოში "ნაციონალური მოძრაობის" 6-მა დეპუტატმაც გამოაცხადა.
გუშინ, შიმშილობა დაიწყო საქართველოს პარლამენტის 10-მა წევრმა.
იგივე მოთხოვნით, 3 ნოემბრიდან შიმშილობს ელენე ხოშტარია, 13 ნოემბერს დაიწყო შიმშილობა გირჩი-მეტი თავისუფლებას ქუთაისის ოფისის წევრმა, იმედა კლდიაშვილმა.
