გერმანიის კანცლერის, ფრიდრიხ მერცის განცხადებით, თუ აშშ-ის პრეზიდენტი დონალდ ტრამპი რუსეთის პრეზიდენტ ვლადიმირ პუტინს მაიამიში დაგეგმილ „დიდი ოცეულის“ (G20) სამიტზე მიიწვევს და შეხვედრაზე რუსეთ-უკრაინის ომის საკითხი განიხილება, მოლაპარაკებებში უკრაინაც უნდა მონაწილეობდეს.
ამის შესახებ მერცმა 3 ნოემბერს, ბერლინში, უკრაინის პრეზიდენტ ვოლოდიმირ ზელენსკისთან ერთად გამართულ პრესკონფერენციაზე განაცხადა.
„თუ პრეზიდენტი ტრამპი რუსეთის პრეზიდენტის მოწვევას გადაწყვეტს, მაშინ უკრაინაზე უნდა ვისაუბროთ. ხოლო თუ უკრაინაზე უნდა ვისაუბროთ, უკრაინის პრეზიდენტიც მოლაპარაკებების მაგიდასთან უნდა იჯდეს“, - განაცხადა მერცმა.
მისი თქმით, დაუშვებელია, სხვა ქვეყნებმა უკრაინის ბედი უკრაინის მონაწილეობის გარეშე გადაწყვიტონ.
„თუ უკრაინა მოლაპარაკებების მაგიდასთან იქნება, იქ ევროპაც იქნება“, - აღნიშნა გერმანიის კანცლერმა.
მერცის განცხადებით, ევროპაში უკვე მიმდინარეობს მოლაპარაკებები სამიტისთვის მზადების საკითხზე, რადგან ომის დიპლომატიური გზით მოგვარების შესაძლებლობა ხელიდან არ უნდა გაუშვან.
გერმანიის კანცლერმა ასევე განაცხადა, რომ ევროპას სამშვიდობო მოლაპარაკებებში მონაწილეობა სურს და ეს აუცილებელიცაა, რადგან მის გარეშე ძირითადი საკითხების გადაწყვეტა შეუძლებელია.
მერცის თქმით, გერმანია უკრაინის მხარდაჭერას მომავალშიც გააგრძელებს. მან ასევე ისაუბრა საჰაერო თავდაცვისა და ენერგეტიკის სფეროებში დამატებითი დახმარების შესახებ მიღწეული შეთანხმებების შესრულებაზე.
