საქართველოში "ფაიზერის" შემოტანის თარიღი დაზუსტებულია, თუმცა ამ დროისათვის ის საჯარო არ არის.
როგორც დაავადებათა კონტროლის ეროვნული ცენტრის ხელმძღვანელმა ამირან გამყრელიძემ განაცხადა, მისთვის "თარიღი ცნობილია, თუმცა ვერ გეტყვით, ვიდრე თვითმფრინავი ჰაერში არ იქნება".
ამირან გამყრელიძის თქმით, საწყის ეტაპზე ქვეყანაში "ფაიზერის" გარკვეული დოზები შემოვა, რომელსაც მალევე დაემატება დამატებითი დოზებიც.
მანამდე, მთავრობის ადმინისტრაციაში გამართულ ბრიფინგზე ჯანდაცვის მინისტრის მოადგილემ თამარ გაბუნიამ განაცხადა, რომ ქვეყანა Pfizer-ის დოზებს უახლოეს დღეებში მიიღებს.
"უახლოეს დღეებში შემოვა Pfizer-ის ვაქცინა და მოსახლეობას ექნება საშუალება იმისი, რომ Pfizer-ის ვაქცინით ჩაიტაროს ვაქცინაცია თუ კი მისთვის ეს არჩევანი უპირატესია, მაგრამ დღეს არსებული ყველა ის ვაქცინა, რომელი გვაქვს - Sinopharm, Sinovac, AstraZeneca, არის დადასტურებული ეფექტურობით და ახლა თითოეული დღის დაკარგვა ნამდვილად კრიტიკულია, შემთხვევა იმატებს. მინდა მოვუწოდო მოსახლეობას, აქტიურად ჩართვისკენ ვაქცინაციის პროგრამაში, რაც მიმდინარეობს მთელი ქვეყნის მასშტაბით და კიდევ უფრო გაფართოვდება," - განაცხადა თამარ გაბუნიამ.
