მთავრობის ადმინისტრაციაში, სადაც საკოორდინაციო საბჭოს სხდომის დასრულების შემდეგ ჯანდაცვის მინისტრის მოადგილის ბრიფინგი უნდა გამართულიყო, ჟურნალისტებმა და ოპერატორებმა 5 ივლისს დაფიქსირებული ძალადობის გასაპროტესტებლად პერფორმანსი მოაწყვეს.
ჟურნალისტებს თან ჰქონდათ ლექსო ლაშქარავას ფოტოები და ფურცლები წარწერით - "გადადგეს ირაკლი ღარიბაშვილი", "დაისაჯონ დამნაშავეები".
„ფორმულას“ ჟურნალისტმა გიორგი კიკაბიძემ განაცხადა, მაშინ, როდესაც ოპერატორ ლექსო ლაშქარავას დღეს კრძალავენ, არავის აქვს მორალური უფლება ტრიბუნასთან იდგეს.
"თანამდებობა აუცილებლად უნდა დატოვოს პრემიერ-მინისტრმა ირაკლი ღარიბაშვილმა, რადგან ის არის ნომერ პირველი ჰომოფობი ჩვენს ქვეყანაში. ის არის მოძალადე პრემიერ-მინისტრი და დაუყოვნებლივ უნდა წავიდეს თანამდებობიდან. გარდა ამისა, დამნაშავეები, რასაკვირველია, უნდა დაისაჯონ,“- განაცხადა გიორგი კიკაბიძემ.
