"ამ ქვეყანაში ჟურნალისტებს კლავენ" - ასე დაიწყო "ტვ პირველის" ეთერში თავისი ემოციური მიმართვა ხელისუფლებისადმი ჟურნალისტმა ინგა გრიგოლიამ.
ინგა გრიგოლია მიმართავს პრემიერ-მინისტრ ღარიბაშვილს აიღოს მომხდარზე პასუხისმგებლობა და გადადგეს თანამდებობიდან.
"ვინმეს ეჭვი გეპარებათ, რომ ამ წვერიანებს თუ უწვეროებს, თავსაფრიანებს თუ უთავსაფროებს, არ ვიცი რა ვუწოდო, ამ არაადამიანებს ხელისუფლებასთან აქვთ კავშირი. ვის სჭირდება, ხალხო, თქვენი სამძიმარი?! რაღაცა ენის მოჩლექა, რომ იზიარებ ტვ პირველის... იზიარებ კი არა პრემიერს მინდა მივმართო, აიღე პასუხისმგებლობა და გადადექი. როგორც ქვეყნის პრემიერმა აიღე პასუხისმგებლობა და გადადექი. თუ ვინმე პოლიტიკოსი მეტყვის, რომ ამ ტრაგედიის ფონზე, ჩვენ ისევ იგივე პრემიერი გვყავს, რომელმაც წააქეზა იმ დილით... რა ექსპერტიზის პასუხიც არ უნდა დაიდოს. თქვენ რამე ხო არ გეშლებათ? ვინ შეჭამს თქვენ შეკერილს... " - თქვა ინგა გრიგოლიამ.
შეგახსენებთ, დღეს დილით, ტვ პირველის ოპერატორი ლექსო ლაშქარავა გარდაიცვალა. მას 5 ივლისს თბილისში მიმდინარე საპროტესტო აქციაზე ძალადობრივმა ჯგუფებმა სასტიკად სცემეს.
