დიდი ბრიტანეთის ელჩმა საქართველოში მარკ კლეიტონმა პოლიციას "თბილისი პრაიდის" კვირეულის ფარგლებში გამართულ ღონისძიებაზე უსაფრთხოების უზრუნველყოფისთვის მადლობა გადაუხადა.
"დავესწარი ბრიტანული ფილმის ჩვენებას. საქართველოში LGBT+ თემი იბრძვის თავისუფლებისა და თანასწორობის იმავე ხარისხისთვის რაც სხვებს აქვთ.
ღირსეული, ძალადობისგან და დისკრიმინაციისგან თავისუფალი ცხოვრების უფლება უნივერსალურია. მივესალმები სამართალდამცავთა ძალისხმევას, რომ ჩვენებას მშვიდობიანად ჩაევლო", - განაცხადა ელჩმა.
"თბილისი პრაიდის" კვირეულის ფარგლებში დახურული კინოჩვენება გაიმართა, რომელსაც დიპლომატიური კორპუსის წარმომადგენლებიც ესწრებოდნენ. ტერიტორიის სიახლოვეს, სადაც ჩვენება იმართებოდა, შეიკრიბნენ რადიკალური ჯგუფების წარმომადგენლები, რომლებიც ღონისძიებაზე მისულ სტუმრებს კვერცხებსა და ბოთლებს უშენდნენ.
სამართალდამცველებსა და პრაიდის მოწინააღმდეგეებს შორის დაპირისპირებისას პოლიციამ რამდენიმე პირი დააკავა.
