როგორ შეიძლება საქართველოთი ევროპის დაშინება, – ასე უპასუხა ანგელა მერკელმა სტუდენტის კითხვას, ხომ არ შეუქმნის პრობლემას საქართველოს ევროინტეგრაციას ევროპაში ულტრამემარჯვენე პოპულისტური პარტიების გაძლიერება, რადგან ისინი აღმოსავლეთ პარტნიორობის მიმართულებით გაფართოებას ეწინააღმდეგებიან.
ანგელა მერკელის თქმით, ევროპაში ნამდვილად არის ულტრამემარჯვენე პოპულისტური პარტიების გაძლიერების ტენდენცია, ამ მიმართულებით ძალიან მძიმე ბრძოლა იქნება 2019 წლის მაისში, ევროპარლამენტის არჩევნების კონტექსტში.
„კიდევ ვინ გინდათ, დასავლეთ ბალკანური ქვეყნებიღა გაკლდათ – საქართველო, უკრაინა თავისი პრობლემებით – ასეთი არგუმენტები არსებობს სწორედ იმისთვის, რომ ევროპის კონტინენტზე ხალხი ხელოვნურად დააშინონ.
როგორ შეიძლება საქართველოთი ევროპის დაშინება, როგორ შეიძლება მონსტრულ სიტუაციად ამის წარმოჩენა. რა „პრობლემები“ შეიძლება შექმნას საქართველოს გაწევრიანებამ. ეს არის ადამიანური ემოციები, ძალიან ადვილად მანიპულირებადია და ძალიან დიდი სიფრთხილეა ამ თვალსაზრისით“, – განაცხადა ანგელა მერკელმა.
მისივე განცხადებით, ევროპის სახელმწიფოების ერების ნაწილს ეშინია გლობალიზაციის პროცესის.
„მაგალითად, საბერძნეთი, ასევე იტალიის სამხრეთით არის პრობლემები, ან საფრანგეთი. თითოეული სვამს კითხვას, მე მინდა ჩემი საკუთარი მე, მე მინდა ჩემი თვითმყოფადობა, მე მეშინია გლობალიზაციის პროცესის“, – აღნიშნა მერკელმა, რომელმაც აქვე დასძინა, რომ ადამიანის პატივი, ღირსება, ყველაფერი ერთობლივად უნდა იქნას დაცული სხვა პარტნიორებთან ერთად.
„ჩვენ ვიცით, რომ ნებისმიერი ქვეყანა ცალკე აღებული, მათ შორის 80-მილიონიანი გერმანიაც მარტოდმარტოა, ეულად არის დარჩენილი საკუთარი ფასეულობების ანაბარად, თუ ის ინდივიდუალურად, ერთპიროვნულად იმოქმედებს. ადამიანის პატივი, ღირსება, ყველაფერი ერთობლივად უნდა იქნას დაცული, სხვა პარტნიორებთან ერთად“, – განაცხადა მერკელმა.
