ხორავას ქუჩაზე მომხდარი მკვლელობის ერთ-ერთი მოწმის მამამ, პროკურატურის ყოფილი თანამშრომელმ, მირზა სუბელიანმა შსს დატოვა.
მურზა სუბელიანი შსს-ში გამოკითხვაზე დღეს დაახლოებით 14:30 საათზე მივიდა. 9-საათიანი გამოკითხვის შემდეგ მან შსს დატოვა.
“ვერანაირ კომენტარს ვერ გავაკეთებ. გამომძიებლებს ჰქონდათ შეკითხვები და გავეცი პასუხები. რამდენჯერაც დამიბარებენ, იმდენჯერ მოვალ. იყო დამატებითი შეკითხვები”,- განაცხადა სუბელიანმა.
ხორავას ქუჩაზე მომხდარ მკვლელობას პროკურატურა იძიებდა. მას შემდეგ რაც თბილისის საქალაქო სასამართლომ ხორავას ქუჩაზე მომხდარი მკვლელობის საქმეზე გადაწყვეტილება გამოაცხადა, მთავარი პროკურორის ირაკლი შოთაძის გადადგომის მოთხოვნით, საზოგადოება პროკურატურასთან აქცია გამართა. მოსამართლემ ერთი ბრალდებული დავით სარალიძესთან მიმართებაში, ხოლო მეორე ლევან დადუნაშვილთან მიმართებაში გაამართლა.
გარდაცვლილი დავით სარალიძის მამა, ზაზა სარალიძე პროკურატურას რეალური მკვლელების მფარველობაში ადანაშაულებდა და აცხადებდა, რომ პროკურატურამ მტკიცებულებები დამალა და გამოძიება პროკურატურის ყოფილი თანამშრომლის მირზა სუბელიანის გავლენის ქვეშ მიმდინარეობდა.
მთავარ პროკურატურასთან საპროტესტო აქციის მიმდინარეობის დროს, მთავარმა პროკურორმა ირაკლი შოთაძემ განცხადება გააკეთა და აღნიშნა, რომ გამოძიება ობიექტურად და სამართლიანად წარიმართა და პროკურატურა თბილისის საქალაქო სასამართლოს გადაწყვეტილებას სააპელაციო სასამართლოში გაასაჩივრებდა. ამ განცხადებიდან რამდენიმე საათში მთავარმა პროკურორმა ირაკლი შოთაძემ თანამდებობა დატოვა.
მთავარი პროკურორის გადადგომის შემდეგ, განცხადება გააკეთა საქართველოს პრემიერ-მინისტრმა გიორგი კვირიკაშვილმა და განაცხადა, რომ ხორავას ქუჩაზე მომხდარი მკვლელობის საქმეს შსს გამოიძიებდა, რომელსაც შს მინისტრი გიორგი გახარია უხელმძღვანელებდა.
შსს-მ გამოძიება დაიწყო და მოწმეთა გამოკითხვა თავიდან დაიწყო. ერთ-ერთი მოწმის მამა მირზა სუბელიანი შსს-მ გამოკითხვაზე პირველად 1-ელ ივნისს დაიბარა. დღეს, კი მირზა სუბელიანის გამოკითხვა 14:30 საათზე დაიწყო.
2017 წლის 1-ელ დეკემბერს ხორავას ქუჩაზე ორი მოზარდი დაჭრეს. ერთი მოზარდი საავადმყოფოში მიყვანამდე გარდაიცვალა, მეორე კი, ექიმების მცდელობისა და რამდენიმე ოპერაციის მიუხედავად, 2 დეკემბერს საავადმყოფოში დაიღუპა. ჯგუფურად ორი მოზარდის მკვლელობაში ორი არასრულწლოვანია ბრალდებული.
