"ბერძენ გემთმფლობელთა ასოციაცია" საქართველოს საზღვაო პოტენციალით დაინტერესებულია. როგორც საზღვაო ტრანსპორტის სააგენტოში განმარტავენ, სააგენტოს დირექტორი თამარ იოსელიანი მსოფლიოში უმსხვილეს "ბერძენ გემთმფლობელთა ასოციაციის" პრეზიდენტს თეოდორე ვენიამინს, საბერძნეთში მიმდინარე გამოფენა Posidonia 2018-ის ფარგლებში შეხვდა. შეხვედრისას თამარ იოსელიანმა ვენიამისს საქართველოში დაგეგმილ საერთაშორისო საზღვაო ფორუმზე დასასწრებად, საქართველოს პირველი ვიცე-პრემიერის დიმიტრი ქუმსიშვილის მოწვევა გადასცა. თავად ფორუმი კი საქართველოში სექტემბრის შუა რიცხვებშია ჩანიშნული.
შეხვედრისას ვენიამისმა აღნიშნა, რომ ტრადიციულად ბერძენ გემთმფლობელებს საქართველოს საზღვაო დროშა და ზოგადად საქართველოს საზღვაო პოტენციალი აინტერესებთ. მისივე განმარტებით, დეტალების განხილვა შესაძლებელია დამატებით ორმხრივ შეხვედრაზე რომელიც უახლოეს მომავალში ჩაინიშნება.
