ამ წუთებში, თბილისის საქალაქო სასამართლოში „ქართული მარშის“ წევრების წინასასამართლო სხდომა მიმდინარეობს. სასამართლო აღკვეთის ღონისძიების გადასინჯვის საკითხზეც იმსჯელობს.
როგორც "ჯი-ეიჩ-ენს" ერთ-ერთი დაკავებულის ადვოკატმა, გიორგი სიმონიშვილმა განუცხადა, ის თავის დაცვის ქვეშ მყოფის მიმართ საქმის შეწყვეტას მოითხოვს. იგივე პოზიცია აქვთ დანაჩენ ადვოკატებსაც.
დაკავებულებს ბრალად ედებათ წინასწარი შეთანხმებით ჯგუფური ხულიგნობა, თუმცა მათგან ერთს გამოძიება დამატებით ცემას, ერთს კი სხვისი ნივთის დაზიანებას ედავება.
ცნობისთვის, „ქართული მარშის“ წევრები ტელეკომპანია „რუსთავი ორთან“ მომხდარი ინციდენტის გამო, სისხლის სამართლის წესით 21 მარტს დააკავეს. „რუსთავი ორის“ შენობასთან „ქართული მარშის“ წევრებმა აქცია 19 მარტს გამართეს. აქციის მონაწილეებმა ჟურნალისტ გიორგი გაბუნიას გზა გადაუკეტეს და აცხადებდნენ, რომ ქრისტიანებისთვის შეურაცხმყოფელი განცხადების გამო, მან ბოდიში უნდა მოიხადოს.
