პრეზიდენტის ადმინისტრაციის ხელმძღვანელის, გიორგი აბაშიშვილის განცხადებით, ყველა მხრიდან მთავარი განწყობა უნდა იყოს კონსენსუსის ძიება.
მისივე განცხადებით, მხარეებს შორის შეთანხმება იქნება, რთული მდგომარეობიდან გამოსვლის ერთადერთი შესაძლებლობა.
„ფაქტია, რომ არსებული რთული მდგომარეობიდან საჭიროა გამოსავლის მოძიება. გამოსავალი არის ერთადერთი - უნდა მოხერხდეს ფართო კონსენსუსი. ის, რომ კონსენსუსი შესაძლებელია, დადასტურდა სხვადასხვა პოლიტიკურ პარტიასთან შეხვედრის დროს, მიუხედავად განსხვავებული შეხედულებებისა მთელ რიგ უმნიშვნელოვანეს საკითხებთან დაკავშირებით, შესაძლებელი გახდა საერთო პოზიციის ჩამოყალიბება. ყველა მხრიდან მთავარი განწყობა უნდა იყოს კონსენსუსის ძიება. ამ შემთხვევაში, ეს იქნება ზუსტად ერთადერთი გზა და ბოლო შესაძლებლობა, რათა ამ რთული მდგომარეობიდან გამოვიდეთ. საქართველოს პრეზიდენტის განწყობა არის და იყო ორიენტირებული კონსენსუსზე, შესაბამისად მთავარი მოლოდინიც და მთავარი შედეგის მიღწევაც არის ამ შემთხვევაში შეთანხმება“, - აღნიშნა გიორგი აბაშიშვილმა.
შეგახსენებთ, დღეს 16:00 საათზე საკონსტიტუციო ცვლილებებთან დაკავშირებით პრეზიდენტის საპარლამენტო უმრავლესობის შვიდ წევრს ხვდება.
