"„ყველა ძალიან კარგად ვხვდებით, რომ თბილისში საჭიროა პარკინგის დამატებითი ადგილების შექმნა", - ამის შესახებ საქართველოს პარლამენტის გარემოს დაცვისა და ბუნებრივი რესურსების კომიტეტის თავმჯდომარემ, კახა კუჭავამ განაცხადა.
მისივე თქმით, ის , რომ თანაინვესტირების ფონდი ასოცირებულია ბიძინა ივანიშვილთან, ოპონენტებისთვის ერთადერთი საფუძველია, წინასაარჩევნოდ თემით სპეკულირება მოახდინონ, მაქსიმალურად იყვირონ, ქულები დაიწერონ და მოსახლეობა შეცდომაში შეიყვანონ
"თაბორის მთაზე მალე წარმოუდგენელი მასშტაბის პროექტი განხორციელდება, რომელიც ყველასთვის ხელმისაწვდომი იქნება.
პროექტთან დაკავშირებით ყველანაირი გეოლოგიური დასკვნა არსებობს და მუშაობა სტანდარტების შესაბამისად წარიმართება.
ის ფაქტორი, რომ თანაინვესტირების ფონდი ასოცირებულია ბიძინა ივანიშვილთან, ოპონენტებისთვის ერთადერთ საფუძველს წარმოადგენს, წინასაარჩევნოდ თემით სპეკულირება მოახდინონ, მაქსიმალურად იყვირონ, ქულები დაიწერონ და მოსახლეობა შეცდომაში შეიყვანონ.
ძალიან სამწუხაროა, როდესაც ოპონენტები წინასაარჩევნოდ ყველანაირ უმსგავსო ხერხს იყენებენ, რათა მოსახლეობა შეცდომაში შეიყვანონ და ისეთი ტყუილები თქვან, რაც ფიზიკურად ვერ დაიმალება. საუბარია პუშკინის სკვერის გასხვისებასთან დაკავშირებით და ფაქტია, რომ სკვერი, რომელზეც ლაპარაკობენ, აბსოლუტურად არ არის იმ გადაწყვეტილების ნაწილი, რომელიც თბილისის საკრებულომ მიიღო.
ყველა ძალიან კარგად ვხვდებით, რომ თბილისში საჭიროა პარკინგის დამატებითი ადგილების შექმნა. ამ პროექტის ფარგლებში, ადგილები მინიმუმ გაორმაგდება, თუ არა გასამმაგდება. ერთადერთი კითხვა, რაც მქონდა, გეოლოგიას უკავშირდებოდა და ამ თვალსაზრისითაც პასუხი მოვისმინეთ, რომ გეოლოგია ჩატარებულია და შესაბამისი ნაბიჯებია გადადგმული, ვიდრე ეს პროექტი იქნებოდა წარდგენილი.
ოპონენტებს მოვუწოდებ, კორექტულები იყვნენ და ტყუილებს ნუ გაავრცელებენ მხოლოდ იმიტომ, რომ ორი დღის განმავლობაში, მოსახლეობის თვალში ქულები ჩაიწერონ“, - განაცხადა კუჭავამ.