" ქვეყანაში გამოხატვის და შეკრების თავისუფლება დაცულია და ეს არავისთვის არ არის ახალი", - ამის შესახებ პარლამენტის იურიდიულ საკითხთა კომიტეტის თავმჯდომარემ ეკა ბესელიამ განაცხადა.
მისივე თქმით, ცალკეული პირების მხრიდან თბილისის მერიასთან ადგილი ჰქონდა დადგენილი წესების დარღვევას, რაც კადრებში ძალიან კარგად ჩანდა.
„ყველაფერს თავისი წესები და ფორმა აქვს. ჩვენს უფლებებსაც შეუზღუდავი სახე არ აქვს და გარკვეულ უფლებებთან ერთად ვალდებულებები გვაქვს, რომელიც უნდა დავიცვათ. გუშინ, ცალკეული პირების მხრიდან ადგილი ჰქონდა დადგენილი წესების დარღვევას და ეს კადრებში ძალიან კარგად ჩანდა.
ძალიან სამარცხვინო იყო, რომ შეზღუდული შესაძლებლობის მქონე პირებისთვის განკუთვნილი ადგილი დანგრეული იყო. არც პარლამენტის წევრს და არც ყოფილ წევრს არ აქვს განუსაზღვრელი უფლებები. წესების დაცვით ყველა სურვილის რეალიზება შეიძლება მოხდეს, მაგრამ როცა კადრს ვხედავთ, ყოფილი შინაგან საქმეთა მინისტრი პოლიციელს როგორ ურტყამს, ეს კადრი არაფერს ამართლებს“, - დასძინა ბესელიამ.
