“ბაგრატის ტაძრის ძირითადი ნუსხიდან ამოღება იუნესკოში მისი ისტორიის დასასრული არ არის, რადგან, მიმდინარეობს პროექტზე მუშაობა, რომლის მიხედვითაც ბაგრატს მსოფლიო მემკვიდრეობის ნუსხაში დაბრუნების შანსი სხვა ნომინაციით გაუჩნდება”, - ამის შესახებ კულტურისა და ძეგლთა დაცვის მინისტრმა მიხეილ გიორგაძემ განაცხადა.
მისივე თქმით, ახალ ნომინაციაზე მუშაობა გერმანელ და პოლონელ პარტნიორებთან ერთად მიმდინარეობს.
„ამით ბაგრატის ისტორია არ დასრულებულა იუნესკოსთან მიმართებაში, რადგან ჩვენ ვიწყებთ ისევ და ისევ იუნესკოს ექსპერტებთან ერთად ჩვენი გერმანელი და პოლონელი პარტნიორების დახმარებით ახალ ნომინაციაზე მუშაობას, რომელიც გულისხმობს ქუთაისის ისტორიული ლანდშაფტის, ისტორიული ზონის ნომინაციის შემუშავებას. რომლის ფარგლებშიც, ერთ-ერთ შემადგენელ ნაწილად ბაგრატი ისევ იქნება წარმოდგენილი. ამას ვაკეთებთ იმისთვის, რომ მისი რეპრეზენტაცია მსოფლიო მემკვიდრეობის ძეგლების კონტექსტში მაინც არ დაიკარგოს და ამ სახით მაინც იყოს შენარჩუნებული“,- განაცხადა გიორგაძემ.
შეგახსენებთ, რომ მსოფლიო კულტურული მემკვიდრეობის 41-ე კომიტეტის სხდომაზე ბაგრატის ტაძარი ნუსხიდან ამოიღეს ხოლო გელატის მონასტერი დარჩა მსოფლიო მემკვიდრეობის ნუსხაში.
