პრეზიდენტი მმართველ გუნდს საკონსტიტუციო დიალოგის დაწყებას 10 ივლისიდან სთავაზობს, - აღნიშნული განცხადება პრეზიდენტის პოლიტიკურმა მდივანმა ჟურნალისტებთან დღეს გააკეთა და აღნიშნა, რომ საჭიროა, უახლოეს ხანებში გადაიდგას კონკრეტული ნაბიჯები დისკუსიის დასაწყებად და იმ საკითხთა ნუსხაზე ჩამოსაყალიბებლად, რომელთა შესახებაც კონსენსუსთან დაკავშირებით მზაობა არსებობს.
„საკონსტიტუციო საკითხებთან დაკავშირებით დიალოგის აუცილებლობაზე და მზაობაზე ყველა მხარე საუბრობს.
განსაკუთრებით მნიშვნელოვანი გახლდათ პრემიერ კვირიკაშვილის გუშინდელი განცხადება, რომელიც მკაფიოდ მიანიშნებდა ამ საკითხებზე.
ყველასათვის ცნობილია ის საკითხები, რომლებთან დაკავშირებითაც ქართულ და საერთაშორისო საზოგადოებას კრიტიკული შენიშვნები აქვს: საპარლამენტო საარჩვენო სისტემის, პრეზიდენტის უფლებამოსილების, უსაფრთხოების, სასამართლოს დამოუკიდებლობის და სხვა საკითხები.
დღეს უკვე ყველა ვაცხადებთ იმას, რომ კონსენსუსის გარეშე მიღებული კონსტიტუცია არ იქნება მაღალი ლეგიტიმაციის მქონე, დაბალი ლეგიტიმაციის კონსტიტუცია კი, ვერ უზრუნველყოფს ქართული სახელმწიფოს წინაშე მდგარი ამოცანების გადაჭრას, ამიტომ ნუღარ დავაყოვნებთ, რაც უფრო მეტი განცხადება გაკეთდება შესაძლოა, გაჩნდეს ახალი სხვადასხვა საკითხები და ამან ერთგვარი დაბნეულობა გააჩინოს საზოგადოებაში, გადავდგათ კონკრეტული ნაბიჯები, შევიკრიბოთ, ალბათ ორშაბათს, ჩამოვყალიბდეთ რა საკითხებზე შეგვიძლია კონკრეტული ნაბიჯების გადადგმა და რით შეგვიძლია ვუპასუხოთ საერთაშორისო საზოგადოების ძალიან მკაფიო მოწოდებას, რეკომენდაციას, მითითებას ამ პროცესთან დაკავშირებით“,- აღნიშნა ფიქრია ჩიხრაძემ.
მისი თქმით, თუ პოლიტიკური ნება იარსებებს ბევრი გზის გამონახვა შეიძლება იმისათვის, რომ ურთიერთთანხმობის დოკუმენტი ისე მივიღოთ, რომ არსებული პროცესი სამართლებრივი ჩარჩოებიდან ამოვარდეს, მაგრამ რეალურად ჩვენ მივიღოთ კონსენსუსის საფუძველზე შექნილი დოკუმენტი და გამართული კონსტიტუცია.
