,,საზოგადოებრივთან“ დაკავშირებით საკანონმდებლო პაკეტზე არავის, არცერთი წინადადება არ შემოუთავაზებია, - განაცხადა ჟურნალისტებთან პარლამენტის იურიდიულ საკითხთა კომიტეტის თავმჯდომარე ეკა ბესელიამ.
,,საკანონმდებლო პაკეტის ინიცირებიდან 6 თვის შემდეგ, მივიღეთ ერთი ორგანიზაციის მხრიდან რამდენიმე საკითხზე მოსაზრება. არავის არ შემოუთავაზებია არც ერთი წინადადება და კომენტარი. სამუშაო ჯგუფში ყველას მოწვევა არ ხდება. ეს პარლამენტის სამუშაო ჯგუფია და წარმომადგენლები დაასახელეს, რომლებიც რამდენიმე ორგანიზაციას წარმოადგენდა. მათ შორის იყვნენ - "საერთაშორისო გამჭვირვალეობა - საქართველო", მედია ექსპერტები და მათგან არც ერთი წინადადება არ მიგვიღია. რაც შეეხება იმას, თითქოს, ამას არ ახლავს არც ერთი ექსპერტული მოსაზრება, ევროპის მაუწყებელთა კავშირის და მეორე ევროპული ორგანიზაციის ორი ექსპერტული მოსაზრება არსებობს. ასევე ევროსაბჭოს ეგიდით ექსპერტიზა ჩატარდა და ევროპის მაუწყებელთა კავშირმა ამ წინადადებებს ძალიან მაღალი შეფასება მისცა. ასე, რომ ეს არის მეორე სიცრუე, რომელიც ამ განცხადებაშია", - აღნიშნა ბესელიამ.
დეპუტატი მზადყოფნას გამოთქვამს, რომ საკანონმდებლო პაკეტის სამართლებრივ ნაწილთან დაკავშირებით დამატებითი არგუმენტები მოისმინოს.