„ექსპერტების ჩვენება დეკანოზ გიორგი მამალაძისთვის ცალსახად სასარგებლო იყო“ - ამის შესახებ „ჯი-ეიჩ-ენს“ მამალაძის ადვოკატმა, გიორგი ფანცულაიამ განუცხადა.
„დღევანდელ სასამართლო პროცესზე 22 მოწმე დაიკითხა, თითოეული მოწმისგან მიღებული ინფორმაცია ძალიან მნიაშვნელოვანი იყო. დეკანოზის მიერ გამოძიების ეტაპზე მიცემული ჩვენება თითოეული მოწმის მიერ დასტურდება კიდეც. რა თქმა უნდა, გიორგი მამალაძეს ციანიდი ჩაუდეს. რაც შეეხება ჩანაწერს, ის ციანიდზე სწორედ იმის გამო სვამს კითხვას, რომ ციანიდი შორენამ სთხოვა, ოქრომჭედლობისთვის სჭირდებოდა. როცა დეკანოზმა ამის გარკვევა და კითხვა დაიწყო, აგენტ-პროვოკატორმა ირაკლი მამალაძემ მისი ჩაწერა განახორციელა. ეს თავიდან ბოლომდე დადგმული სპექტაკლი იყო“, -აცხადებს ადვოკატი.
მისი თქმით, დღევანდელ პროცესზე დაკითხულმა ექსპერტებმა დაადასტურეს, რომ ნატრიუმის ციანიდი ოქრომჭედლობაში გამოიყენება. თუმცა, ფანცულაიას განცხადებით, გამოძიებამ მამალაძის ჩვენება არ გადაამოწმა და ამ საკითხთან დაკავშირებით, არც ექპსერტებისთვის დაუსვამთ კითხვები.
რაც შეეხება იარაღს, რომელიც დეკანოზის სახლში იქნა აღმოჩენილი, ადვოკატის თქმით, ირაკლი მამალაძეს ეკუთვნოდა.
„როცა დეკანოზმა იმ იარაღის შესახებ მისცა ჩვენება, რომელიც მას ირაკლი მამალაძემ მიუტანა, იარაღზე ექსპერტიზაც კი არ დანიშნულა, რომ გაერკვიათ ირაკლი მამალაძის ანაბეჭდები იყო თუ არა“ - განუცხადა „ჯი-ეიჩ-ენს“ ფანცულაიამ.
როგორც ადვოკატი აცხადებს, დღეს სასამართლოს დეკანოზ გიორგი მამალაძის პატიმრობიდან გირაოს სანაცვლოდ გათავისუფლების თაობაზე მიმართეს, რაც არ დაკმაყოფილდა.
„პროცედურულად, ყოველ ორ თვეში პატიმრობის გადასინჯვა ხდება. დეკანოზს სწორედ დღეს უწევდა ამ ვადის გადასინჯვა. ჩვენ დავაყენეთ შაუმდგომლობა, გირაოთი ჩაგვედო მამა გიორგი მამალაძის სახლი, სადაც მისი ოჯახი, 3 მცირეწლოვანი შვილი, საერთო ჯამში 12 ადამიანი ცხოვრობს. დეკანოზი მის ცოლ-შვილს გარეთ არ დატოვებდა, შესაბამისად ვითხოვდით, გირაოთი გამოსულიყო, რომ განაჩენის გამოცხადებას თავისუფლებაში დალოდებოდა. სამწუხაროდ, მოსამართლემ ამ ეტაპზე ჩვენი პოზიცია არ გაიზიარა. არადა, სამართლებრივად ყველა საფუძველი არსებობდა, რომ ჩვენი შუამდგომლობა დაეკმაყოფილებინათ.
თუმცა, სასამართლო პროპცესი ისე მიმდინარეობს, დარწმუნებული ვარ, მომდევნო პროცესებზე მაინც მიიღებს მოსამართლე გადაწყვეტილებას და დეკანოზს განაჩენის გამოატანამდე გარეთ გამოუშვებს“, - ამბობს ფანცულაია.
რაც შეეხება ყოფილი მაღალჩინოსნის, ირაკლი ფირცხალავას დაკითხვას, ადვოკატის თქმით, ის სასამართლომ დასაკითხ მოწმეთა სიაში შეიყვანა. თუმცა, როდის მოხდება მისი დაკითხვა, ჯერ ცნობილი არ არის, რადგან ამ ეტაპზე პროკურატურის მოწმეები იკითხებიან.
შემდეგი სასამართლო პროცესი 7 ივლისს, დილის 11 საათზეა ჩანიშნული.