მაქვს მეილი, სადაც მიდასტურებს ბატონი თომას მარკერტი, რომ როგორც კი გამოეგზავნა დასკვნა საქართველოს პარლამენტის თავმჯდომარეს, ასევე გაეგზავნა საქართველოს პრეზიდენტსაც, - ამის შესახებ პარლამენტის პირველმა ვიცე-სპიკერმა თამარ ჩუგოშვილმა იურიდიულ საკითხთა კომიტეტის სხდომაზე განაცხადა.
„ჩვენ იმ პირობას ვასრულებდით, რა პირობაც ვენეციის კომისიისთვის გვქონდა მიცემული. ვინაიდან პრეზიდენტის ადმინისტრაციის წარმომადგენელმა ანა დოლიძემ განაცხადა, რომ არ აქვს პრეზიდენტის ადმინისტრაციას ინფორმაცია მიღებული, უბრალოდ თავს ვალდებულად ვთვლი, რომ მეც ის ინფორმაცია გავაჟღერო, რაც მაქვს. ვინაიდან მე ვარ საკონტაქტო პირი ვენეციის კომისიისთვის საკონსტიტუციო კომისიიდან. მე მაქვს ის მეილი, სადაც მიდასტურებს ბატონი თომას მარკერტი, რომ როგორც კი გამოეგზავნა დასკვნა საქართველოს პარლამენტის თავმჯდომარეს, ასევე გაეგზავნა საქართველოს პრეზიდენტსაც. თუ ვინმეს აინტერესებს, ტელეფონში მეილი მაქვს და შემიძლია ნებისმიერ დაინტერესებულ ადამიანს გავუზიარო“, - განაცხადა თამარ ჩუგოშვილმა.
როგორც თამარ ჩუგოშვილიმა აღნიშნა, მისთვის გულდასაწყვეტია, რომ პროცესის მიმართ გარკვეული წინააღმდეგობა და ბოიკოტი მაშინ დაიწყო, სანამ თავად პროცესი დაიწყებოდა და გამოიკვეთებოდა, რას აპირებდა საკონსტიტუციო კომისია.
მისივე თქმით, სანამ ეს მოსაზრებები გაჟღერდებოდა, უკვე თვითმიზანი წინააღმდეგობა იყო და არა ის, რომ გარკვეული წვლილის შეტანა პროცესში.
როგორც თამარ ჩუგოშვილმა განაცხადა, ვენეციის კომისიის წინასწარ მოსაზრებაში ერთ-ერთი მთავარი ჩანაწერი არის ის, რომ წერტილი ესმება სრულყოფილ სისტემას, სრულყოფილი ხდება საპარლამენტო სისტემაზე გადასვლა და ეს ს არის ძალიან მნიშვნელოვანი ჩანაწერი.