სახალხო დამცველის უჩა ნანუაშვილის ინფორმაციით, დაზიანებების გამო, იზოლატორმა მოქალაქის მიღებაზე უარი განაცხადა.
"პოლიციელების მხრიდან დაკავებულის პირის ინფორმაციით, ადგილი ჰქონდა მუქარას, ძალადობის, მათ შორის სექსუალური ძალადობის შესახებ. ამ ადამიანს სხეულზე დაზიანებები აღენიშნებათ. საქმეში არსებობს შესაბამისი მტკიცებულებები, თვით იზოლატორმაც კი უარი განაცხადა ამ პირის მიღებაზე, იმის გამო, რომ მას ასეთი დაზიანებები აღენიშნებოდა. ჩვენ მივმართეთ პროკურატურას გამოძიების დაწყების მოთხოვნით სავარაუდო არასათანადო მოპყრობის ფაქტთან დაკავშირებით", - განაცხადა უჩა ნანუაშვილმა.
სახალხო დამცველის ინფორმაციით, მოქალაქეს სავარაუდოდ თბილისის პოლიციის დეპარტამენტის გლდანი–ნაძალადევის სამმართველოს მე–10 განყოფილების თანამშრომლები დაემუქრნენ.
სახალხო დამცველმა მთავარ პროკურორს გუშინ ბრალდებულის მიმართ პოლიციელების მხრიდან განხორციელებული სავარაუდო არასათანადო მოპყრობის ფაქტზე გამოძიების დაწყების შესახებ წინადადებით მიმართა.
