"ამერიკის საელჩო მუდმივ კონტაქტშია საქართველოს მთავრობასთან, ის აცნობიერებს ამ საკითხის სერიოზულობას,"- ამის შესახებ საქართველოში ამერიკის შეერთებული შტატების ელჩმა იან კელიმ აზერბაიჯანელი ჟურნალისტის, აფგან მუხთარლის საქმეზე კომენტირებისას განაცხადა.
"თქვენ, ალბათ, ყველამ იხილეთ სახელმწიფო დეპარტამენტის განცხადება ამ საკითხზე, რომლის მიხედვითაც, დეპარტამენტი მოუწოდებს აზერბაიჯანს ამ პიროვნების გათავისუფლებისკენ. გარდა ამისა, მოუწოდებს საქართველოს მთავრობას, რომ ძალიან დეტალურად და სრულად გამოიძიოს ამ საქმის ირგვლივ არსებული გარემოებები. ჩვენ ვართ ახლო კონტაქტში მთავრობასთან და ის აცნობიერებს ამ საკითხის სერიოზულობას. ჩვენ ასევე მივიღეთ მოთხოვნა სამოქალაქო საზოგადოებისგან, ამ საკითხზე შეხვედრასთან დაკავშირებით და ხვალ ჩვენ შევხვდებით ჟურნალისტებს და მოვისმენთ მათ მოსაზრებებს",- განაცხადა ელჩმა.
იან კელიმ აღნიშნა, რომ ამ საკითხზე ხვალ საელჩოში მედიის წარმომადგენლებს შეხვდება. „ხვალ, 11.00 საათზე ჩვენ შევხვდებით ჟურნალისტებს და მოვისმენთ მათ მოსაზრებებს ამ საკითხზე“, - აღნიშნა იან კელიმ.
