ახალგაზრდა იურისტთა ასოციაციის თავმჯდომარე ანა ნაცვლიშვილი იუსტიციის უმაღლესი საბჭოს მდივნის ლევან მურუსიძის მოსამართლედ უვადოდ დანიშვნის საკითხთან დაკავშირებით ამბობს, რომ თუკი ასეთ გადაწყვეტილებას საბჭო მიიღებს, ეს იქნება უდიდესი დარტყმა სასამართლო სისტემაზე.
"გამოსაცდელ ვადაზე გვქონდა ჩვენ არაერთი კრიტიკული მოსაზრება. ჩვენი მონიტორინგი აჩვენებს, რომ პროცედურა ფორმალურია და არ ხდება იმის შესწავლა, მოსამართლეებმა ამ ვადებში რამდენად გამოავლინეს საჭირო უნარ-ჩვევები. ერთი მხრივ, ხელისუფლება გვეუბნება, რომ გამოსაცდელი ვადა საჭიროა, თუმცა მათი კვალიფიკაციის შემოწმება არ ხდება. რაც შეეხება მურუსიძეს, სახელები და გვარები არ არის მნიშნელივანი, მაგრამ ეს სახელები და გვარები ხდება შემაშფოთებელი მესიჯის მატარებელი,"- განაცხადა ანა ნაცვლიშვილმა.
იუსტიციის უმაღლეს საბჭოში მოსამართლეთა უვადოდ გამწესების საკითხის განხილვა გადაიდო. იუსტიციის საბჭოს წევრებმა მხარი დაუჭირეს ევა გოცირიძის ინიციატივას, რომლის მიხედვითაც უზენაესი სასამართლოს ყოფილი მოსამართლეები, ვინც გამოსაცდელი ვადით არიან დანიშნული, მოსამართლის თანამდებობაზე ავტომატურად უვადოდ გამწესდნენ. ეს კი იმას ნიშნავს, რომ უვადოდ გამწესდება ლევან მურისიძეც.
