თუ დავრწმუნდებით, რომ სასიკეთო არაფერი გამოდის, ჩვენ დამაზიანებელ შედეგზე პასუხისმგებლობას არ ავიღებთ და სახელმწიფო საკონსტიტუციო კომისიას მხოლოდ მაშინ დავტოვებთ, - ამის შესახებ ჟურნალისტებს „თავისუფალი დემოკრატების“ თავმჯდომარემ, შალვა შავგულიძემ განუცხადა, რომელიც არასამთავრობო ორგანიზაციებთან და პრეზიდენტ გიორგი მარგველაშვილთან დაკავშირებით, პარლამენტის თავმჯდომარის, ირაკლი კობახიძის მიერ გაკეთებულ განცხადებას გამოეხმაურა.
შავგულიძე სპიკერის განცხადებას სიცრუეს უწოდებს და ამბობს, რომ პრეზიდენტის მხრიდან არავითარი კონსულტაციები და მოწოდებები არ ყოფილა.
"მსგავსი მოწოდება არც ერთ შეხვედრაზე არ ყოფილა. პრეზიდენტთან და მის ადმინისტრაციასთან საკმაოდ მჭიდრო კომუნიკაცია გვაქვს და მათგან მსგავსი რამ არ დაფიქსირებულა. ვფიქრობ, რომ ხელისუფლების მხრიდან ეს პრევენციული განცხადებაა. ალბათ ჩვენი ქვეყნის ინტერესებისთვის მეტად დამაზიანებელი საბოლოოდ შედეგის დადებას აპირებენ და იციან, რომ ასეთ შემთხვევაში, „ქართული ოცნებისა“ და რამდენიმე ექსპერტის გარდა, ალბათ კომისიას ყველა დატოვებს და ამის პრევენციას აკეთებენ, თითქოს პრეზიდენტი პროვოცირებას ახდენს“, - აღნიშნავს შავგულიძე.
რაც შეეხება კომისიაში ყოფნის თაობაზე „თავისუფალი დემოკრატების“ პოზიციას, შავგულიძის განმარტებით, იმ შემთხვევაში, თუკი საბოლოოდ დარწმუნდებიან, რომ კომისიის მუშაობის შედეგი ქვეყნის დემოკრატიული და სამართლებრივი განვითარებისთვის დამაზიანებელი იქნება, "თავისუფალი დემოკრატები" ასეთ დამაზიანებელ შედეგზე პასუხისმგებლობას ვერ აიღებენ.
„რაც უნდა სამწუხარო იყოს, თუ დავრწმუნდებით, რომ სასიკეთო არაფერი გამოდის, ჩვენ დამაზიანებელ შედეგზე პასუხისმგებლობას არ ავიღებთ და კომისიას მხოლოდ მაშინ დავტოვებთ“, - განაცხადა შავგულძემ.
პარლამენტის თავმჯდომარის, ირაკლი კობახიძის განცხადებით, მმართველ გუნდს სარწმუნო ინფორმაცია ჰქონდა, რომ პრეზიდენტი ცალკეულ პარტიებსა და არასამთავრობო ორგანიზაციებთან მათ მიერ კომისიის დატოვებასთან დაკავშირებით კონსულტაციებს მართავდა.
პარტიამ „სახელმწიფო ხალხისთვის“ სახელმწიფო საკონსტიტუციო კომისია დღეს დატოვა.
