სახალხო დამცველი ოკუპირებული ტერიტორიების შესახებ კანონში ცვლილებების შეტანის რეკომენდაციით გამოდის, რომლის თანახმადაც, პირი, რომელიც ამ კანონს დაარღვევს, მხოლოდ ადმინისტრაციული პასუხისმგებლობით უნდა ისჯებოდეს და არ დაეკისროს სისხლის სამართლის პასუხისმგებლობა.
ასევე, უჩა ნანუაშვილის რეკომენდაციის მიხედვით, უნდა დაწესდეს შეღავათიანი საგადასახადო რეჟიმი ოკუპირებულ ტერიტორიაზე მომუშავე მეწარმეებისთვის.
„კანონი უნდა იყოს მიმართული მხოლოდ ოკუპაციის და ოკუპანტების წინააღმდეგ. საოკუპაციო ხაზის მიმდებარე ტერიტორიაზე მაცხოვრებელი მოსახლეობა ზარალდება იმ შეზღუდვებით, რომელსაც აწესებს ეს კანონი. მსგავსი კანონი მოქმედებს მსოფლიოს არაერთ ქვეყანაში, თუმცა იქ სპეციალური ჩანაწერებია ძალიან დეტალური იმისთვის, რომ მოსახლეობის უფლებები იყოს დაცული,“ - განაცხადა უჩა ნანუაშვილმა.
ოკუპირებული ტერიტორიების შესახებ კანონში ცვლილებებზე მუშაობა ჯერ კიდევ წინა მოწვევის პარლამენტმა დაიწყო, თუმცა 3 წლის წინ საკანონმდებლო ცვლილებები პირველ მოსმენას არ გასცილებია. მაშინ ინიცირებული პროექტით, ოკუპირებული ტერიტორიიდან საქართველოში კანონდარღვევით პირველად შემოსვლისას, პირი სისხლის სამართლებრივი პასუხისმგებლობისგან თავისუფლდებოდა.
