ბრიტანეთის პოლიციამ ხუთი მამაკაცი დააკავა, რომლებსაც RAF Fairford-ის ავიაბაზის ტერიტორიაზე ტერაქტის მომზადებაში ედებათ ბრალი. სამართალდამცველების ცნობით, სავარაუდო თავდასხმის სამიზნე ბაზაზე განთავსებული ამერიკული ბომბდამშენები იყო. ინფორმაციას Associated Press ავრცელებს.
სამართალდამცველების ინფორმაციით, ეჭვმიტანილები სამხედრო ობიექტის ტერიტორიაზე შეღწევას და იქ განთავსებული ამერიკული სტრატეგიული ბომბდამშენების აფეთქებას გეგმავდნენ. აღნიშნული თვითმფრინავები ირანის წინააღმდეგ მიმდინარე ოპერაციებში მონაწილეობენ.
პოლიციამ ინციდენტის შესახებ ინფორმაცია კვირას, 00:45 საათზე მიიღო. უწყების ცნობით, ბაზისკენ მიმავალი სამი საეჭვო სატვირთო ავტომობილი დააფიქსირეს და მათი შეჩერება ბაზის მიმდებარე ველფორდის რაიონში შეძლეს.
ადგილზე ასაფეთქებელი მოწყობილობების განაღმვის სპეციალისტები და სპეციალური რობოტი გაგზავნეს. შესაძლო აფეთქების მაღალი რისკის გამო, პოლიციამ 400-მეტრიანი უსაფრთხოების ზონა შექმნა და მიმდებარე 85 სახლიდან მოსახლეობის ევაკუაცია განახორციელა.
თავდაპირველად ხუთივე პირი ასაფეთქებელი მოწყობილობების შესახებ კანონის (Explosives Act) დარღვევის ეჭვით დააკავეს, თუმცა მოგვიანებით საქმე ტერორიზმთან დაკავშირებული მუხლით გადაკვალიფიცირდა.
შეგახსენებთ, აშშ-ის პრეზიდენტმა დონალდ ტრამპმა, განაცხადა, რომ დაკავებულები ავიაბაზისთვის დიდი ზიანის მიყენებას ცდილობდნენ.
