საპარლამენტო ფრაქცია „პატრიოტთა ალიანსი“ ნდობის ჯგუფის წევრობის კანდიდატების სიცრუის დეტექტორით შემოწმებას მოითხოვს
დღეს გამართულ პრესკონფერენციაზე ფრაქციის წევრმა ადა მარშანიამ განაცხადა, რომ ნდობის ჯგუფში მისი ფრაქციის წარმომადგენელი აუცილებლად უნდა იყოს.
„დღემდე გაურკევეველი მდგომარეობაა „ნდობის ჯგუფში“ ჩვენს წარმომადგენელთან დაკავშირებით. ემზარ კვიციანის გარშემო როგორი პროცესები განვითარდა, კარგად იცით. ვითხოვთ, რომ ირმა ინაშვილი ჩვენგან იყოს წარმოდგენილი. ასევე, ნდობის ჯგუფის წევრობის ყველა კანდიდატმა სიცრუის დეტექტორი უნდა გაიაროს’’, - აცხადებს ადა მარშანია.
ცნობისათვის, ნდობის ჯგუფში კვოტა, სადაც ერთი წევრის წარდგენის უფლება უმრავლესობისა და უმცირესობის გარეთ მყოფ დეპუტატებს აქვთ, შესაძლოა, მეხუთე წევრის გარეშე დარჩეს.
ენმ-ის გაყოფამდე, უმრავლესობისა და უმცირესობის გარეთ მხოლოდ შვიდი დეპუტატი იყვნენ: 6-კაციანი ფრაქცია “საქართველოს პატრიოტების“ წევრები და მთაწმინდის მაჟორიტარი სალომე ზურაბიშვილი. ნდობის ჯგუფში საკუთარი კანდიდატურის დასახელების უფლება ფრაქცია “საქართველოს პატრიოტებმა“ გამოიყენა და დეკემბრის ბოლოს, უმრავლესობისა და უმცირესობის გარეთ მყოფი მეტი დეპუტატის მხარდაჭერით, ირმა ინაშვილი წარადგინა. ამის შემდეგ უმრავლესობისა და უმცირესობის გარეთ ფრაქცია “ნაციონალური მოძრაობა“ ჩამოყალიბდა, რომელიც ასევე 6-დეპუტატისაგან შედგება და ნდობის ჯგუფში აღნიშნულ ერთ ადგილზე წევრის დასახელების უფლება მასაც აქვს. გავრცელებული ინფორმაციით, ეს სალომე სამადაშვილი იქნება.
ამ შემთხვევაში კი, თეორიულად, გადამწვეტი სალომე ზურაბიშვილის პოზიცია იქნება. როგორც ცნობილია ზურაბიშვილი არცერთი კანდიდატისთვის მხარდაჭერას არ აპირებს. ასეთ შემთხვევაში კი, ნდობის ჯგუფს მეხუთე წევრი არ ეყოლება.
პარლამენტის ნდობის ჯგუფი, თავდაცვისა და უშიშროების კომიტეტში, აღმასრულებელი საპარლამენტო უმცირესობამ საკუთარი კვოტით პარლამენტის ნდობის ჯგუფში ირაკლი აბესაძე დაასახელა. “ქართულ ოცნებას“ ამ დრომდე არ გადაუწყვეტია, თუ ვინ იქნება წარდგენილი მაჟორიტარი დეპუტატებისა და უმრავლესობის კვოტით. არაოფიციალური ინფორმაციით, მაჟორიტარებიდან – არჩილ თალაკვაძის კანდიდატურა, ხოლო უმრავლესობის კვოტით გია ბენაშვილის კანდიდატურა განიხილება.
