საქართველოს ტექნიკურ უნივერსიტეტში „საერთაშორისიო ურთიერთობების კლუბის“ და „მომავალ საჯარო მოხელეთა ასოციაციის“ წარმომადგენლებმა ერთობლივი პროექტის პრეზენტაცია გამართეს. ეს ინიციატივა მოიცავს ახალგაზრდების მომზადებას მომავლის საქართველოსთვის.
პროექტის ავტორების განცხადებით, ამ ინიციატივით მხოლოდ საქართველოს ტექნიკური უნივერსიტეტის სტუდენტები არ არიან დაინტერესებულნი და მალე მათ გუნდს სხვა უნივერსიტეტის სტუდენტები შეავსებენ.
გურანდა გოლიაძე, „საერთაშორისო ურთიერთობების კლუბი“, პრეზიდენტი:
_ კლუბი სტუდენტებმა ორი თვის წინ ჩამოვაყალიბეთ, სადაც ამ ეტაპზე 30 სტუდენტია გაერთიანებული, ძირითადად საერთაშორისო ურთიერთობების სპეციალისტები და მხოლოდ სტუ-ს სტუდენტები, თუმცა ეს იმას არ ნიშნავს, რომ მალე სხვა უნივერსიტეტების სტუდენტები არ შემოგვიერთდებიან. კლუბის კარი ყველასთვის ღიაა, ვისაც საერთაშორისო ურთიერთობები აინტერესებთ. ჩვენი მიზანია ამ სფეროთი დაინტერესებული ადამინებისთვის თეორიული და პრაქტიკული გამოცდილების მიღების ხელშეწყობა, ამისათვის ვაწყობთ დებატებს, დისკუსიებს, საჯარო შეხვედრებს დიპლომატებთან, იმ ადამიანებთან, რომელთაც აქვთ გამოცდილება. გვაქვს იდეა მოვაწყოთ დიპლომატიური კვირეულები. მინდა ხაზგასმით აღვნიშნო, რომ „მომავლის საჯარო მოხელეთა ასოციაციას“ და „საერთაშორისო ურთიერთობების კლუბს“ დიდ მხარდაჭერას უცხადებს საქართველოს ტექნიკური უნივერსიტეტის ადმინისტრაცია და ეს წარმატების ერთგვარი გარანტიაა.
გიორგი მამულაშვილი, „მომავლის საჯარო მოხელეთა ასოციაცია“, დამფუძნებელი:
_ ჩვენი ასოციაციის დაარსების მთავარი მიზანია ხელი შეუწყოს იმ სტუდენტებს, რომელთაც საჯარო სამსახურში მოღვაწეობა აქვთ დაგეგმილი, ამისათვის ჩვენ მათ ხელს ვუწყობთ სტაჟირება გაიარონ სახელმწიფო სხვადასხვა უწყებაში, ასევე მოხდება შიდა საუნივერსიტეტო სტაჟირება, სტუ-ს დეპარტამენტებში. მინდა გითხრათ, რომ ამის რეალური რესურსი არის. იმისათვის, რომ უფრო საინტერესო გავხადოთ ჩვენი ინიციატივა, იგეგმება წარმატებულ საჯარო მოხელეებთან სტუდენტების შეხვდედრები, საერთაშორისო ორგანიზაციებთან თანამშრომლოიბა, ამ ეტაპზე წარმატებით დავასრულეთ გერმანულ მხარესთან მოლაპარაკება და ეს არის ძალიან მნიშვნელოვანი ნაბიჯი.