მეორე არხის გენერალური დირექტორი, „საზოგადოებრივი მაუწყებლის“ ნდობის ჯგუფის წევრი დოდო შონავა აცხადებს, რომ „საზოგადოებრივი მაუწყებლის“ რეფორმა და მოდერნიზება მისაღებია, ოღონდ დამუშავებული კონცეფციით და სამოქმედო გეგმით.

,,ჩვენთვის მიუღებელია მაუწყებლის შეჩერება 11 თვით, თვითმმართველობის არჩევნების დროს და მაშინ, როდესაც საკონსტიტუციო ცვლილებები იხილება. ნურავის ნუ ეგონება, რომ ჩვენ ცვლილებების წინააღმდეგი ვართ, ჩვენ წლებია ცვლილებებს მოვითხოვთ. ჩვენ მოვითხოვთ კომპეტენტურ მენეჯმენტს და ადამიანური რესურსებისა და ფინანსების მართლზომიერ მართვას, ჩვენ ვიწყებთ ძალიან სერიოზულ დოკუმენტზე მუშაობას, რომელსაც წარვუდგენთ საზოგადოებას და ბორდს. ამ დოკუმენტში გაწერილი იქნება ის პრინციპები, რომლითაც მიგვაჩნია, რომ „საზოგადოებრივი მაუწყებლის“ ეტაპობრივი მოდერნიზება უნდა მოხდეს. ის, რომ ჩვენს ეთერში არ არის ღირებული პროდუქცია, ეს არის მიზანმიმართული დისკრედიტაცია. ჩვენ ძალიან კარგი პროდუქტი გვაქვს, უბრალოდ, საჭიროა თავიდან ავიცილოთ დამოკიდებულება, რომელიც ვფიქრობ, მიზანმიმართულია იმისთვის, რომ მაყურებელმა იფიქროს, რომ აქ მართლაც „კარმუშკაა“, ანუ სახრავისთვის ვართ მოსულები“, - განაცხადა დოდო შონავამ.

რაც შეეხება „საზოგადოებრივ მაუწყებელთან“ დაკავშირებით პრემიერ-მინისტრის დღევანდელ განცხადებებს, დოდო შონავა ფიქრობს, რომ კვირიკაშვილმა რეფორმებს დაუჭირა მხარი.

საზოგადოებრივი მაუწყებლის სამეთვალყურეო საბჭო არხის გენერალურ დირექტორ ვასილ მაღლაფერიძესთან შეხვედრას მართავს.