14 თებერვალს (11:45სთ - 16:00სთ) LCC-საერთაშორისო უნივერსიტეტის ორგანიზებით თბილისში საჯარო მეტყველების საერთაშორისო კონკურსი გაიმართება. სპიკერების კონკურსს სააკაშვილის საპრეზიდენტო ბიბლიოთეკა უმასპინძლებს (მისამართი: გიორგი სააკაძის დაღმართი 10, თბილისი 0160).
საჯარო მეტყველების საერთაშორისო კონკურსი საქართველოში მესამედ ტარდება და წელს უკვე 52 ქართველ კონკურსანტს ითვლის. მონაწილეებს შორის საქართველოს სხვადასხვა ქალაქის - თელავის, რუსთავის, გორის, ქუთაისისა და ბათუმის საჯარო თუ კერძო სკოლის მოსწავლეებიც მოიაზრებიან.
კონკურსი ხელს უწყობს ახალგაზრდებში საჯარო მეტყველების უნარ-ჩვევების განვითარებასა და ინგლისური ენის პოპულარიზაციას. კონკურსის ფინანსური მხარდამჭერია ლიტვის, აშშ-სა და კანადის საელჩოები.
LCC-ის ვიცეპრეზიდენტი აისტე მოტეკაიტიენე - ციტატა: „საჯარო მეტყველების საერთაშორისო კონკურსი ლიტვაში უკვე 20 წელია ტარდება. ვფიქრობ, ამ ეტაპზე კონკურსის მასშტაბების გაზრდა და მისი სხვა ქვეყნებში პოპულარიზაცია ამ მიმართულების განვითარებისათვის წინგადადგმული (მნიშვნელოვანი) ნაბიჯი იქნება. ეროვნული კონკურსის რჩეული მონაწილეები საქართველოდან, უკრაინიდან, სომხეთიდან, ალაბანეთიდან, ლიტვიდან, რუსეთიდან და მოლდოვიდან საჯარო მეტყველების საერთაშორისო კონკურსის საფინალო ტურში მიიღებენ მონაწილეობას, რომელიც 29 მარტს ლიტვაში გაიმართება (გასულ წლებში ლიტვის საფინალო ტურში 3 ქართველი გადავიდა). საბოლოო გამარჯვებული კი ერთი სემესტრის განმავლობაში LCC - საერთაშორისო უნივერსიტეტში ისწავლის. კონკურსზე გამგზავრების ხარჯებს უნივერსიტეტი უზრუნველყოფს“.
LCC - საერთაშორისო უნივერსიტეტი ლიტვაში ამერიკულ საგანმანათლებლო პროგრამებს ინგლისურ ენაზე ახორციელებს. უნივერსიტეტის სტუდენტთა უმრავლესობა (60%) მსოფლიოს 30 სხვადასხვა ქვეყნის მოქალაქეა, პროფესორების 70% კი ინგლისურად მოსაუბრე ამერიკელი და კანადელი პროფესიონალები არიან. LCC თბილისის სკოლებთან 2012 წლიდან თანამშრომლობს და აღნიშნული უნივერსიტეტის საბაკალავრო პროგრამაზე უკვე 30 ქართველი სტუდენტი სწავლობს.