„საზოგადოებრივი მაუწყებლის“ გენერალური დირექტორის მრჩეველმა ნოდარ ჭიჭინაძემ დღეს გამართულ პრესკონფერენციაზე განაცხადა, რომ რეფორმის დამტკიცების შემთხვევაში, კანონი არ დაირღვევა.
„მე ვარ ფინანსური კონსულტანტი და იურიდიული შეფასება გამიჭირდება. თუმცა ბუნებრივია, იურისტებიც მუშაობენ ამ საკითხზე და თუ რეფორმა იქნება დამტკიცებული, განხორციელდება ისე, რომ არ მოხდება კანონის დარღვევა“, - განაცხადა ნოდარ ჭიჭინაძემ.
მისივე თქმით, გენერალურ დირექტორს კანონით არ აქვს უფლებამოსილება, რომ დახუროს გადაცემები.
,,ბევრი ინტერპრეტაცია მოჰყვა ამ გეგმის გაჟღერებას, რომ გადაცემები იხურება. კანონით არ აქვს უფლებამოსილება გენერალურ დირექტორს, რომ დახუროს გადაცემები. ახალმა დირექტორმა წარმოადგინა ხედვა, რომ თუ გვინდა და საზოგადოებას უნდა გადარჩეს ტელევიზია, ამისთვის საჭიროა რაღაც გადაცემების დროებით შეჩერება“, - განაცხადა ნოდარ ჭიჭინაძემ.
საზოგადოებრივ მაუწყებელში სამეურვეო საბჭო ვასილ მაღლაფერიძის მიერ წარდგენილ სამოქმედო გეგმას დღეს განიხილავს.
