ფრაქცია „ნაციონალური მოძრაობა“ რუსეთთან ურთიერთობის საკითხებში პრემიერ-მინისტრის სპეციალურ წარმომადგენელ ზურაბ აბაშიძეს პარლამენტში იბარებს. პარლამენტის საგარეო ურთიერთობათა კომიტეტს, აბაშიძის მოწვევის მოთხოვნით, სალომე სამადაშვილმა მიმართა
სამადაშვილი ჟურნალისტებთან ზურაბ აბაშიძის განცხადებასაც გამოეხმაურა, რომლის თანახმადაც, ევროპასთან უვიზო რეჟიმი არის მათ შორის, აბაშიძე-კარასინის ფორმატის დამსახურება.
,,ეს არის პირდაპირ ჩვენი საზოგადოების შეცდომაში შეყვანის მცდელობა, რომ თითქოს ჩვენ ჯერ რუსეთთან უნდა დავალაგოთ ურთიერთიერთობები და ამის შემდეგ გვექნება წარმატება ევოატლანტიკური ინტეგრაციის გზაზე. ამ დროს პირიქითაა. საქართველოს შეუქცევადი ევროპული მომავალი არის ერთადერთი რამ, რაც ჩვენ დაგვეხმარება რუსეთთან ურთიერთობების დარეგულირებაში და ბატონმა აბაშიძემ მსგავსი განცხადებები, რომლებიც პირდაპირ რუსეთის ინტერესებში შედის, არასდროს უნდა გააკეთოს, თუ ის მართლაც საქართველოს სახელმწიფო ინტერესებს წარმოადგენს ამ მოლაპარაკეკებზე”, - განაცხადა სამადაშვილმა.
მისივე თქმით, მხოლოდ 2016 წლის განმავლობაში საქართველოს 85 მოქალაქეა დაკავებული საოკუპაციო რეჟიმის მიერ. აქედან გამომდინარე, სალომე სამადაშვილს აინტერესებს, აღნიშნული მოლაპარაკებების რომელ წარმატებაზე აქვს საუბარი ზურაბ აბაშიძეს.
