სახეზეა ყველა სახის კრიზისი, რაც კი წარმოსადგენია. ეკონომიკურ კრიზისს ემატება მთავრობის უუნარობა და უფრო მეტიც, მავნებლობა, - აცხადებს „ჯი-ეიჩ-ენთან“ საუბარში პოლიტიკური გაერთიანება „სამოქალაქო პლატფორმა-ახალი საქართველოს“ ერთ-ერთი დამფუძნებელი სერგო ჩიხლაძე.
მისი შეფასებით, ეს სხვა არაფერია თუ არა მოსახლეობის დაცინვა და აბუჩად აგდება
„პარლამენტში მოკალათებული ე.წ. უმრავლესობა, სრულად აცდენილია რეალობას და მსჯელობენ - რა სარგებლობა მოაქვს ბენზინის გაძვირებას; რა კარგია რომ დოლარს ახურდავებ და ბევრი ლარი მოგდის; როგორ აუმჯობესებს ჯანმრთელობას გზრდილი ფასები და მსგავსი სისულელეები. ეს სხვა არაფერია თუ არა მოსახლეობის დაცინვა და აბუჩად აგდება. ამ ფონზე, კიდევ გვაპარებენ ისეთ თემებს, როგორიცაა - ოკუპაციის კანონის გაუქმება. ქართული ოცნებისა და არსებული ხელისუფლების სახით, გვყავს ხალხისმოძულე, უნიჭო და მტერთან კოლაბორაციონზმში მყოფი ხელისუფლება“, - აცხადებს ჩიხლაძე და აღნიშნავს, რომ ამ ვითარებიდან ერთადერთი გამოსავალი მთავრობის სრული შემადგენლობით გადადგომა, არალეგიტიმური და რეალობას სრულად მოწყვეტილი პარლამენტის დათხოვნა და ვადამდელი საპარლამენტო არჩევნებისთვის მზადებაა.
„ყოველი დღე, ყოველი წუთი ამ ხელისუფლების პირობებში არის საქართველოსთვის დამღუპველი. დაცდის, დაკვირვების, "ჭკვიანი სახით" დიდაქტიკური საუბრების დრო დღეს აღარ არის. მთავრობა და უმრავლესობა სრულ აგონიაშია და ეს უნდა უსწრაფესად დავასრულოთ“, - აცხადებს „ჯი-ეიჩ-ენთან“ საუბარში ჩიხლაძე.
