საქართველოში ევროკავშირის წარმომადგენლობის ხელმძღვანელმა, ელჩმა იანოშ ჰერმანმა დღეს გამართულ პრესკონფერენციაზე იმედი გამოთქვა, რომ გაგრძელდება მუშაობა ახალ პარლამენტთან და ახალ მთავრობასთან, რომ ასოცირება განხორცილდეს:
”რაც შეეხება დღეს ევროკომისიის მიერ გამოქვეყნებულ ანგარიშს, მინდა გითხრათ, რომ ეს ანგარიში ერთჯერადია, თუმცა განვაგრძობთ მასზე მრავალჯერადად მუშაობას. ანგარიშში ძალიან ნათლად არის ხაზგასმული პროგრესი, ის ადგილებიც ხაზგასასმელად აღსანიშნავია, სადაც შემდგომ პროგრესზეა საუბარი. აუცილებლად შედგება საქართველოს და ევროკავშირის ლიდერების შეხვედრა. მე მინდა მოგილოცოთ, თქვენ ხართ ძალიან ახლოს ასოცირების განხორციელების პროცესში და მნიშვნელოვან საფეხურზე დგახართ. დიდი იმედი მაქვს, რომ შედეგები, რომელიც დღეს არის მიღწეული კიდევ უფრო განვითარდება და საქართველო უფრო წინ წაიწევს ამ სფეროში. ასევე დიდი იმედი მაქვს და ველოდები, რომ განვაგრძობთ მუშაობას ახალ პარლამენტთან და ახალ მთავრობასთან, რომ ასოცირება განვახორციელოთ. დარწმუნებული ვართ, რომ ეს ემსახურება ქართველთა ინტერესებს”, – განაცხადა იანოშ ჰერმანმა.
ევროპული საგარეო ქმედების სამსახურისა და ევროკომისიის საერთო ანგარიში აფასებს საქართველოს როლს ასოცირების დღის წესრიგის განხორციელებაში 2015 წლის 1 იანვრიდან. ანგარიშის მიხედვით, საქართველომ განახორციელა რიგი რეფორმები, რომელიც აძლიერებს დემოკრატიას და კანონის უზენაესობას, ასევე ასოცირების ხელშეკრულების სხვა მნიშვნელოვან სფეროებს, რომელიც ძალაში 2016 წლის 1 ივლისს შევიდა. საქართველოს დემოკრატიული ინსტიტუტები გაძლიერდა და მიღებული იყო ყოვლისმომცველი საკანონმდებლო ჩარჩო ადამიანის უფლებებისა და ანტიდისკრიმინაციის კუთხით. ანგარიშში ასევე ნათქვამია, რომ საქართველომ წარმატებით განახორციელა ვიზალიბერალიზაციის სამოქმედო გეგმის მოთხოვნები, რაც დაადასტურა ევროკომისიამ თავის წინადადებაში ევროსაბჭოსა და ევროპარლამენტისადმი საქართველოს მოქალაქეებისათვის სავიზო ვალდებულების მოხსნის შესახებ.
