„ახალი მთავრობის ამ უნიათო შემადგენლობის წყალობით, 2017 წლის ბოლომდე სამთავრობო კრიზისი გარდაუვალია“, - აცხადებს „ჯი-ეიჩ-ენთან“ საუბარში პოლიტიკური გაერთიანება „სამოქალაქო პლატფორმა-ახალი საქართველოს“ ერთ-ერთი დამფუძნებელი სერგო ჩიხლაძე.
მისი შეფასებით, ძველ მთავრობას, რომელიც გაუარსესებული მცირედი შესწორებით, დაამტკიცა პარლამენტმა, ქვეყნის ეკონომიკური კრიზისიდან გამოსაყვანად არანაირი გეგმა არც ჰქონია და არც ახლა გააჩნია.
“მთავრობაში კვლავ ვიხილეთ მინისტრი, რომელიც ეჭვმიტანილია საყდრისის აფეთქებასა და კორუფციულ ტენდერებში. მინისტრი, რომელიც ეროვნული სასწავლო გეგმების გაგებაში არ არის, და კობმლეს „სასამართლო“ პროცესითაა დაკავებული. მინისტრი, რომელიც ლარის გაუფასურებას აბრალებს ხან ბრექსიტის შედეგებს და ხან - მზეზე პროტონების აფეთქებას. ასევე, მინისტრი, რომელიც ფიქრობს, რომ რაც უფრო მეტი დაუგეგმავი ფული იხარჯება ბიუჯეტიდან, მით უფრო, ხარჯთეფექტურია მისი დარგი. ასევე, დაემატა მინისტრი - მედროვეობის კლასიკური ნიმუში - აქტიური ოპოზიციონერი, რომელიც მთავრობას პოლიტპატიმრების არსებობაში ადანაშაულებდა და დღეს, მმართველი ძალის აპოლოგეტია“, - ამბობს „ჯი-ეიჩ-ენთან“ საუბარში ჩიხლაძე და აღნიშნავს, რომ პარლამენტმა ახალი მთავრობის დამტკიცებით, სამთავრობო კრიზისი დაანონსა.
„ამაზე პრემიერმა ძალიან პირდაპირ განაცხადა და თქვა, რომ არ უნდა ველოდოთ პენსიების მატებას, არ უნდა ველოდოთ სხვადასხვა დარგში დასაქმებულ საჯარო მოხელეთა ხელფასების მატებას, არ უნდა ველოდოთ ეკონომიკაში წინსვლას, რადგანაც ამ მაჩვენებლებით, 80-100 წელიც კი ვერ დავეწევით საშუალო ევროპულ მაჩვენებლებსო“, - ამბობს ჩიხლაძე და აღნიშნავს, რომ პარლამენტმა, დაამტკიცა მთავრობა, რომელიც ბოლო წლების განმავლობაში წარუმატებლობის, უუნარობის, დაბალი კვალიფიკაციისა და სტაგნაციის სავიზიტო ბარათია.