პოლიტოლოგი არჩილ გამზარდია ამბობს, რომ მას პრემიერ კვირიკაშილის გამოსვლა, ხშირად აგონებს მიხეილ სააკაშვილის გამოსვლებს, რადგან ერთიცა და მეორეც რეალობისადმი არაადეკვატურია. მისივე თქმით, რა თქმა უნდა არის ძალიან დიდი განსხვავება მათ თვითგამოხატვაში. „სააკაშვილი იყო აგრესიული, სხვებზე თავდამსხმელი და ა.შ. პრემიერი კვირიკაშვილი კი ყოველთვის პოლიტკორექტულია, აკადემიური, პოზიტიური, მშვიდი და დიპლომატიური“
"პრემიერ კვირიკაშვილის გამოსვლა ხშირად მაგონებს მიხეილ სააკაშვილის გამოსვლებს იმით, რომ მახსოვს როგორ ყვებოდა სააკაშვილი აწყობილი და აშენებული ქვეყნის შესახებ, რომელშიც ის ცხოვრობდა, თუმცა ჩვენ სხვა საქართველოში ვიყავით - ახლა პრემიერი კვირიკაშვილი გვიყვება ბედნიერი და თვითკმაყოფილი ქვეყნის შესახებ, რომელშიც ის ცხოვრობს, ჩვენ კი რატომღაც სხვა ქვეყანაში აღმოვჩნდებით ხოლმე ისევ.
თუმცა, არის ძალიან დიდი განსხვავება მათ თვითგამოხატვაში, სააკაშვილი იყო აგრესიული, სხვებზე თავდამსხმელი და ა.შ. პრემიერი კვირიკაშვილი კი ყოველთვის პოლიტკორექტულია, აკადემიური, პოზიტიური, მშვიდი და დიპლომატიური.
კი, ძალიან დიდი განსხვავებაა ფორმებში, კვირიკაშვილი არ გთრგუნავს და არ გაღიზიანებს სააკაშვილისგან განსხვავებით, მაგრამ... შინაარსი მაინც იგივე რჩება, ერთიცა და მეორეც რეალობისადმი არაადეკვატურია, ლიდერები გვიმტკიცებენ რომ ვცხოვრობთ ბედნიერ, გაუმჯობესებულ, წინწაწეულ ქვეყანაში და რომ ვართ ბედნიერები და ყველა კარგად ვგრძნობთ თავს, რეალობა კი გვიმტკიცებს საწინააღმდეგოს.
გარკვეული პროგრესი მაინც გვაქვს, მაგრამ იმედი მაქვს, არც ისე შორს იქნება ის დღე, როდესაც ქვეყნის ლიდერი, ფორმის კონსტრუქციულობასთან ერთად შინაარსშიც ადეკვატური იქნება“,- ამბობს გამზარდია.
