როგორც ჩანს „ნაციონალურ მოძრაობასა“ და „ქართულ ოცნებას“ შორის ჟღურტული მართლაც მიდის, - ამის შესახებ პარლამენტის წევრმა, ემზარ კვიციანმა თავდაცვისა და უშიშროების კომიტეტის თავმჯდომარის მოადგილის არჩევის საკითხზე საუბრისას განაცხადა.
„რაც დღეს მოხდა, ეს ერთგვარი ტესტია, როცა თავდაცვისა და უშიშროების კომიტეტის თავმჯდომარის მოადგილის არჩევის საკითხი ჩავარდა და მე კოლეგების მხარდაჭერა ვერ მივიღე. დღეს მიმტკიცებდნენ, რომ „ნაციონალურ მოძრაობასა“ და „პატრიოტთა ალიანსს“ შორის გარიგება შედგა, მაგრამ ჩვენს შორის არანაირი გარიგება არ ყოფილა და არც არასოდეს იქნება. კვოტა ორივე ოპოზიციურ პარტიას გვეკუთვნის და უმრავლესობა ხმას რომელ კანდიდატსაც მისცემს, მოადგილეც ის გახდება. საუბარი არ არის იმაზე, რომ მე გინდა თუ არა მოადგილეობა მინდა. ეს პრინციპის საკითხია“, - განაცხადა კვიციანმა გადაცემა 2030-ში.
მისი თქმით, გარიგება არც „პატრიოტთა ალიანსსა“ და „ ქართულ ოცნებას“ შორის შემდგარა.
„ჩვენს შორის არანაირი შეთანხმება არ ყოფილა. თუ შეთანხმება არსებობდა, ჩვენმა ფრაქციამ რატომ წარმადგინა?! აქ მეორე მომენტია - 2 დღის უკან რეგიონალური მართვის კომიტეტში წარმადგინეს, სადაც ოთხი თუ ხუთი წარდგინება მიიტანეს და ყველა წარდგინება დროზე მივიდა, ჩემმა კი დააგვიანა. ორი დამთხვევა ერთად როგორ შეიძლება?! აქ უკვე უნცაური რაღაცები ხდება”, - განაცხადა პარლამენტის წევრმა.
როგორც მან აღნიშნა, გალაშქრება არა კონკრეტულად ემზარ კვიციანის წინააღმდეგ, არამედ პატრიოტებისა და საქართველოს პატრიოტიზმის წინააღმდეგ ხდება.
“გამოდის, რომ ვიღაცას, ვინც ქვეყანაში სიტუაციას მართავს, ეს არ აწყობს. ეს გალაშქრება არა კონკრეტულად ემზარ კვიციანის წინააღმდეგ, არამედ პატრიოტებისა და საქართველოს პატრიოტიზმის წინააღმდეგ ხდება. „ოცნებიდან“ დღეს 4 ხმა მივიღე. ასე რომ, იქ ყველა ერთნაირი არაა. არჩევნების დროს იყო ლაპარაკი, რომ „ოცნებაში“ ძალიან ბევრი ნაციონალი გადმოვიდა და როგორც ჩანს, ნაციონალებს მხარს სწორედ ეს ხალხი უჭერს“, - განაცხადა პარლამენტის წევრმა.
