ვფიქრობ, საყდრისის სტატუსის მოხსნასთან დაკავშირებით, სწორი გადაწყვეტილება მივიღე, - განაცხადა პარლამენტის სამი კომიტეტის გაერთიანებულ სხდომაზე კულტურის მინისტრობის კანდიდატმა მიხეილ გიორგაძემ.
დეპუტატ სალომე ზურაბიშვილის კითქვაზე საპასუხოდ.
ენმ-ის წევრმა სერგო რატიანის თქმით კი, გიორგაძის სახელი საყდრისის საბადოს ნგრევას უკავშირდება და საინტერესოა არის თუ არა თანახმა, რომ საკითხზე პარლამენტში საგამოძიებო კომისია შეიქმნას.
“ეს საკითხი ისედაც გადასულია სამართლებრივ სფეროში. კულტურის სამინისტროს წინააღმდეგ სასამართლოში ოთხი სარჩელია შეტანილი. ამ ოთხი სარჩელიდან ერთის განხილვა დასრულდა და ის არ დაკმაყოფილდა. დარჩენილია სამი სარჩელი. საკითხის სამართლებრივი შეფასების პროცესი დაწყებულია. მე ნაბისმიერ ფორმატში მზად ვარ, დასმულ კითხვებს პასუხი გავცე, რაც არაერთხელ გამიკეთებია. საპარლამენტო კომისიის შექმნის მიზანშეწონილობა, პარლამენტის პრეროგატივაა“, - მიმართა კომიტეტის წევრებს მიხეილ გიორგაძემ.
მისივე თქმით, კულტურის და ძეგლთა დაცვის სამინისტრო ძველი თბილისის რაიონში, საკადასტრო ერთეულებისათვის მინიჭებული კულტურული მემკვიდრეობის სტატუსის გადახედვას გეგმავს.
“ცოტა ხნის წინ დასრულდა იმ მისამართების ინვენტარიზაცია, სადაც რეესტრში აღნიშნულია, რომ მას მინიჭებული აქვს კულტურული მემკვიდრეობის სტატუსი. ინფორმაცია გადაცემულია კულტურული მემკვიდრეობის დაცვის სააგენტოში. ჩვენ ამ მისამართებს “გავდივართ“. იმ მისამართზე, სადაც აღმოჩნდება, რომ პრაქტიკულად დღეს არის ჰაერი და სტატუსიდან გამომდინარე, შეზღუდვები ცარიელ ადგილზეა დაწესებული, ჩვენ მთავრობაში შევალთ წინადადებით, რომ ასეთ მისამართებს კულტურული მემკვიდრეობის ძეგლის სტატუსი მოეხსნას. ყველა სხვა შემთხვევაში, სადაც შეიძლება კონკრეტული ნაგებობის, შენობის აღდგენა, კულტურული მემკვიდრეობის ძეგლის სტატუსი არ იქნება მოხსნილი და ამ ობიექტების აღდგენაზე მაქსიმალური ძალისხმევა იქნება მიმართული. ყველას კარგად გვესმის, რომ ეს არ არის მხოლოდ კულტურის სამინისტროს ექსკლუზიური პრეროგატივა. ადგილობრივი ხელისუფლების ძალიან დიდი მონაწილეობის იმედი გვაქვს“, - განაცხადა მიხეილ გიორგაძემ.
