ფრაქცია ”საქართველოს პატრიოტების” ლიდერის ირმა ინაშვილის შეფასებით, ,,ქართული ოცნება“ იმსახურებს იმას, რაც პარლამენტში ხდება, რადგან მისი ტქმით, მათ გააცოცხლეს ,,ნაციონალური მოძრაობა“.
რამდენიმე კომიტეტის გაერთიანებულ სხდომაზე ენმ-ის მიერ დასმული მწვავე შეკითხვების შესახებ ირმა ინაშვილმა ასევე განაცხადა, რომ „ქართული ოცნების“ ქმედებების გარეშე, ენმ-ს პარლამენტში 27 დეპუტატიც არ ეყოლებოდა.
”ქართული ოცნება” იმსახურებს იმას, რაც ახლა დარბაზში ხდება. ”ქართული ოცნება” იმსახურებს იმ შეკითხვებს, რაც იმ ადამიანების მხრიდან მოდის, რომლებიც თვლიან, რომ პოლიტიკური ტერორი არ იყო ამ ქვეყანაში. ძალიან მაინტერესებს, ჟვანია ვინ მოკლა და იყო თუ არა ეს პოლიტიკური ტერორი? ძალიან მაინტერესებს, გურამ შარაძე როგორ მოკლეს და იყო თუ არა ეს ტერორი? არაერთი პოლიტიკური ტერორის მაგალითი შემიძლია შეგახსენოთ. იმსახურებს „ქართული ოცნება“ ამას. თქვენ გააცოცხლეთ ეს ხალხი. თქვენ შეუწყვეთ ხელი ამათ გათეთრებას, ამათ შემოყვანას და დამკვიდრებას „ქართულ ოცნებაში“, თორემ არ იქნებოდნენ დღეს წარმოდგენილნი პარლამენტში 27 დეპუტატით. ეს არის ტრაგედია. მოვითხოვ, მკაფიო განმარტებებს, თუ რატომ მოეხსნა ინტერპოლით ძებნა ზურაბ ადეიშვილს. უნდა ჩამოაბრძანოთ და გაასამართლოთ, ამათ კი არ უნდა ეჟღურტულებოდეთ”, - განაცხადა ინაშვილმა.
