„ნაციონალური მოძრაობის“ წარმომადგენლის ელენე ხოშტარიას განცხადებით, ექსპრეზიდენტ მიხეილ სააკაშვილის გაღიზიანება საპარლამენტო არჩევნების მეორე ტურში მონაწილეობის საკითხმა გამოიწვია.
ხოშტარიას თქმით, აღნიშნული გადაწყვეტილება პარტიამ კოლექტიურად მიიღო და ახლა ვინც არ უნდა ისაუბროს, გადაწყვეტილებას არ შეცვლიან.
„საინტერესო ის არ არის, ვის ვისთან უნდა საერთო. მან ისაუბრა, რა არის მისი უკმაყოფილების, თუ გაღიზიანების საფუძველი. ეს არის პარლამენტში შესვლისა და მეორე ტურში მონაწილეობის საკითხი, რაც ჩვენთვის პრინციპულია. ამაზე ვიმსჯელეთ, მოვისმინეთ ყველანაირი არგუმენტი და დემოკრატიულად, კოლექტიურად მივიღეთ გადაწყვეტილება, რომ პარლამენტში შევდივართ. ვინც არ უნდა გვესაუბროს ახლა ამაზე, ქვეყნის ინტერესებიდან გამოვდივართ და ბუნებრივია, გავაგრძელებთ იმას, რაც გადავწყვიტეთ“, -განაცხადა ხოშტარიამ.
სააკაშვილი დიდ შეცდომად მიიჩნევს იმასაც, რომ პარტიამ „ხელები დაუშვა“ იმის მაგივრად, რომ ხალხი დაერაზმა და ბრძოლისა და შეურიგებლობისაკენ მოეწოდებინა.
„ ხალხმა უნდა იცოდეს, რომ ნაციონალური მოძრაობის ხელმძღვანელობაში მყოფ ერთი-ორ ახირებულ პერსონაჟთან საერთო არაფერი მინდა მქონდეს,“- ამის შესახებ საქართველოს ყოფილმა პრეზიდენტმა მიხეილ სააკაშვილმა „ფეისბუქზე“ გავრცელებულ ვიდეომიმართვაში განაცხადა. ყოფილი პრეზიდენტი კონკრეტულ სახელებს და გვარებს არ ასახელებს, თუმცა პარტიის შიდა დაპირისპირებასა და ბევრ შეცდომას ნაციონალური მოძრაობის ხელმძღვანელობაში მყოფ რამდენიმე პირს უკავშირებს. მისივე შეფასებით, არჩევნების მეორე ტურში პარტიის მონაწილეობა შეცდომა იყო, რადგანაც ამან კიდევ უფრო მეტი დემორალიზება და იმედგაცრუება გამოიწვია.