,,ნაციონალური მოძრაობის” საერთაშორისო ურთიერთობათა მდივანი გიგა ბოკერია მიხეილ სააკაშვილის განცხადებას ეხმიანება და აცხადბს, რომ პარლამენტში შესვლის გადაწყვეტილება იყო სწორი.
“მე კარგად მესმის ჩემი ზოგიერთი თანაგუნდელის, ლიდერის, თუ მხარდამჭერის ემოცია და გაღიზიანებაც კი, მაგრამ ვრჩები ჩემს ძალიან მყარ აზრზე, რომ მიუხედავად ძალადობრივი და არათავისუფალი არჩევნებისა, ერთადერთი სწორი გადაწყვეტილება იყო მეორე ტურებში ბრძოლა და პარლამენტში შესვლა ამ ისტორიულ მომენტში”, – განაცხადა ბოკერიამ.
მისივე თქმით, ქუჩაში პროცესების გადატანა არაფერ კარგს არ მოუტანდა ქვეყანას.
“ეს იყო სწორი გადაწყვეტილება ჩვენი ქვეყნის, ჩვენი პარტიის ინტერესებისთვის და საბოლოო ჯამში, ივანიშვილის რეჟიმის დემოკრატიულად დამარცხების საქმისთვის. სწორედ ასევე მჯერა, რომ ქუჩაში პროცესების გადატანა, ამ ძალადობის მიუხედავად, იქნებოდა უკეთეს შემთხვევაში ორთქლის გამოშვება და არაფერ კარგს არ მოუტანდა არც ქვეყანას ამ კონკრეტულ მომენტში, არც პარტიას და არც ივანიშვილის რეჟიმის დამარცხების საქმეს”, – განაცხადა გიგა ბოკერიამ.
სააკაშვილი დიდ შეცდომად მიიჩნევს იმასაც, რომ პარტიამ „ხელები დაუშვა“ იმის მაგივრად, რომ ხალხი დაერაზმა და ბრძოლისა და შეურიგებლობისაკენ მოეწოდებინა.
„ ხალხმა უნდა იცოდეს, რომ ნაციონალური მოძრაობის ხელმძღვანელობაში მყოფ ერთი-ორ ახირებულ პერსონაჟთან საერთო არაფერი მინდა მქონდეს,“- ამის შესახებ საქართველოს ყოფილმა პრეზიდენტმა მიხეილ სააკაშვილმა „ფეისბუქზე“ გავრცელებულ ვიდეომიმართვაში განაცხადა. ყოფილი პრეზიდენტი კონკრეტულ სახელებს და გვარებს არ ასახელებს, თუმცა პარტიის შიდა დაპირისპირებასა და ბევრ შეცდომას ნაციონალური მოძრაობის ხელმძღვანელობაში მყოფ რამდენიმე პირს უკავშირებს. მისივე შეფასებით, არჩევნების მეორე ტურში პარტიის მონაწილეობა შეცდომა იყო, რადგანაც ამან კიდევ უფრო მეტი დემორალიზება და იმედგაცრუება გამოიწვია.