,,ნაციონალური მოძრაობის” წევრი დავით დარჩიაშვილი ვარაუდობს, რომ მიხეილ სააკაშვილი უკრაინულ პოლიტიკაში ოპოზიციური განწყობით ჩაერთვება. მისი თქმით, სააკაშვილის გადადგომა უკრაინაში არსებულმა სოციალურ-პოლიტიკურმა სისტემამ განაპირობა.
,,ცენტრალური ხელისუფლების მხარდაჭერის გარეშე ოდესაში რეფორმების დაძვრა ძალიან ძნელი აღმოჩნდა. შესაბამისად, რა ვითარებაც არის, ჩემი ვარაუდით საუბარი არის უკრაინის პოლიტიკაში ოპოზიციურად განწყობილი პოლიტიკოსის ჩაბმაზე. ეს შეიძლება არ ნიშნავდეს, რომ დაპირისპირება იქნება ყველასთან, მაგრამ უკრაინაში არსებული სოციალურ-პოლიტიკური სისტემის მიმართ თავისი ოპოზიციური დამოკიდებულება სააკაშვილმა გამოხატა და აქედან გამომდინარე, იქნება ალბათ მისი სამომავლო პოლიტიკური ნაბიჯები”, - განაცხადა დარჩიაშვილმა.
მისივე თქმით, პოროშენკოზეა დამოკიდებული რა სახით გაგრძელდება მათი ურთიერთობა.
”ვიცი, რომ პოროშენკოსთან ნორმალური, ადამიანური ურთიერთობები ჰქონდა და ეს ერთი პერიოდი პოლიტიკურ თანამშრომლობაშიც გადადიოდა. ამავე დროს, თვითონ განაცხადა, რომ ეს არ არის საკმარისი ოლიგარქიულ-კორუფციული სისტემის დარღვევისთვის. უფრო პოროშენკოზეა დამოკიდებული პოროშენკო-სააკაშვილის ერთად ყოფნა”, - აღნიშნა დარჩიაშვილმა.
ოდესის გუბერნატორი მიხეილ სააკაშვილი თანამდებობიდან გადადგა.