სამინისტროების ოპტიმიზაციის პროცესში, ცალკე საკითხად უნდა გამოიყოს დიასპორის სამინისტრო, - განუცხადა „ჯი-ეიჩ-ენს“ პოლიტოლოგმა. არჩილ გამზარდიამ. მისი თქმით, ამ სამინისტროს ძალიან სუსტი მინისტრი ჰყავდა, მაგრამ ეს სფერო ძალიან ფრთხილად შესაფასებელია.
„საქართველოს მოსახლეობის ძალიან დიდი ნაწილი არის საქართველოდან წასული, რომლებთანაც საელჩოები და საკონსულოები საერთოდ არ მუშაობენ. ზოგიერთ შემთხვევაში კი იმედიც არ უნდა გვქონდეს რომ ჩაერთვებიან, რადგან არსებობს სპეციფიკური შემთხვევები, სადაც ისინი ვერ იქნებიან ქმედითუნარიანები. ამიტომ, ვფიქრობ, რომ ამ სამინისტროს შემცირება-არ შემცირება, ან გაუქმება-არ გაუქმება არის და უნდა გახდეს სერიოზული მსჯელობის საგანი. ეს თემა არის განსაკუთრებულად მისახედი, თანაც ამავდროულად, „ქართულ ოცნებას“ საარჩევნო პროგრამაში კიდეც აქვს ხაზგასმული დიასპორასთან განსაკუთრებული მუშაობის თუ ჩართულობის განვითარება. ამიტომ ახლა თუ მიდის მსჯელობა ამ სამინისტროს სრულ გაუქმებაზე ან სხვა სამინისტროსთან ინტეგრაციაზე, ვფიქრობ სერიოზულად არის დასაფიქრებელი, რამდენად სწორი იქნებოდა. არც გაბნეული არ უნდა იყოს ის ფუნქციები, რაც ამ სამინისტროში შედის, არამედ პირიქით, უნდა იყოს ინტეგრირებული დიასპორასთან დაკავშირებული ნებისმიერი საკითხი ერთი სტრუქტურის მოცემულობაში. ბევრი ფუნქცია უნდა იყოს მობილიზებული, რომ დიასპორასთან სახელმწიფომ აქტიურად იმუშაოს, ადგილზე დაეხმაროს ბევრი მხრივ და მათი დახმარებაც ამ სამშობლოსათვის გამოიყენოს. ამიტომ, ვფიქრობ, რომ რეორგანიზაცია, ადამიანური რესურსების, სტრუქტურის კუთხით გაუმჯობესება სჭირდება, თუმცა, ალბათ ცალკე, ავტონომიური სტრუქტურის კუთხით შესაძლებელია ჯობდეს, მით უმეტეს, ამ სამინისტროს საკმაოდ მცირე ბიუჯეტი აქვს“, - ამბობს გამზარდია.