,,ტაბულას“ დამფუძნებელი თამარ ჩერგოლეიშვილი მიიჩნევს, რომ ენმ-მა უნდა იმუშაოს იმაზე, რომ მის მიმართ არსებული შიში გაფანტოს და არა შიშს, არამედ ქვეყნის გადარჩენის გზას დაუკავშიროს მისი ხელისუფლებაში მოსვლა. არჩევნების შედეგებს ჩერგოლეიშვილი სოციალური ქსელით ეხმაურება:
..მე კი მაქვს ბახმარო - წინა სერიის დროს აღვუკვეთე ჩემთან წვდომა იმ ადამიანებს, რომლებსაც ქვეყანაში არეულობის მოწყობა სურდათ და პარლამენტში შესვლის მომხრეებს მოღალატეებს (ისიც საუკეთესო შემთხვევაში) უწოდებდნენ.
მოღალატეებს უწოდებდნენ ადამიანებს, რომლებმაც 4 წლის განმავლობაში თავი არ დაზოგეს, ქვეყანა არ მიუტოვებიათ (მიუხედავად გრანტირებული ტკბილი და უზრუნველი ცხოვრების პერსპექტივისა) და არნახული წნეხის (გივი ააფეთქეს - უბრალოდ არ მოკვდა) მიუხედავად მხარდამჭერთა რაოდენობა წინა არჩევნებთან შედარებით თითქმის 200 000 გაზარდეს.
მოღალატეებს უწოდებდნენ იმ ახალ წევრებსაც, რომლებმაც თავიანთი ცხოვრების წესი გვერდზე გადადეს და უყოყმანოდ დაუდგნენ გვერდში ძალას, რომელიც ლუნატიკ ოლიგარქს უპირისპირდება.
მაგრამ ვიცი, რომ ამ ადამიანებზე თავდასხმები გრძელდება.
ჩემი რჩევაა, ადამიანები, რომლებსაც არა კითხვებზე პასუხი, არამედ მხოლოდ თქვენი ლანძღვა აინტერესებთ, უბრალოდ დაბლოკოთ და მათზე დრო არ კარგოთ.
პოლიტიკური ბრძოლის მთავარი წესი ის არის, რომ უიმედოებზე დრო და ენერგია არ ხარჯო.
ვფიქრობ, ნაციონალურმა მოძრაობამ იმ სირთულეში, რასაც ოცნების საკონსტიტუციო უმრავლესობა ჰქვია შესაძლებლობა უნდა ეძებოს და რეალურად არის კიდეც ეს შესაძლებლობა.
ფაქტია, რომ რაც ამ ქვეყანაში მოხდება, ყველაფერზე პასუხს იმ ხალხის შეფი აგებს, ვინც საკონსტიტუციო უმრავლესობაშია - ვერ დაბრალდება ეს ვერც კოაბიტაციას, ვერც ოპოზიციას.
ამავდროულად, ენმ-მა უნდა იმუშაოს იმაზე, რომ მის მიმართ არსებული შიში გაფანტოს და არა შიშს, არამედ ქვეყნის გადარჩენის გზას დაუკავშიროს მისი ხელისუფლებაში მოსვლა.
კომპეტენციის პრობლემა არ აქვთ. უბრალოდ დღეს მისი ეშინიათ. ხვალ აღარ უნდა ეშინოდეთ.
ამის პოტენციალი ენმ-ს აქვს, თუ გასული ოთხი წლის შეცდომებს გაითვალისწინებს და საერთო საქმეს თუ სჭირდება, ტაბუ დადებული თემები არ იარსებებს.
მოკლედ, მიმაჩნია, რომ რთული მაგრამ საინტერესო და პერსპექტიული დრო იწყება - სამუშაო არის გარეთ და უნდა შეიქმნას ისეთი პირობები, რომელიც გარეთ მუშაობის შესაძლებლობას მოგცემთ, ნაცვლად ვიღაცეებისთვის შიგნით იმის მტკიცებისა, რომ ჟირაფები არ ხართ.
კარგები ხართ ყველა, ვინც თავი არ დაზოგეთ და იმუშავეთ.
update: P. S. "ბოროტება მაშინ იმარჯვებს, როცა კარგი ხალხი უქმად ზის " - ედმუნდ ბერკი” - წერს თამარ ჩერგოლეიშვილი. :)
